Փոքր կոնքի օրգանների բորբոքային հիվանդություններ

Փոքր կոնքի օրգանների բորբոքային հիվանդություններ
Անգլերեն անվանումը՝ Pelvic inflammatory disease

Փոքր կոնքի օրգանների բորբոքային հիվանդությունները (ՓԿՕԲՀ) կանանց մոտ հաճախակի հանդիպող վիճակ է. միջինը 8 կնոջից 1-ն իր կյանքի մի շրջանում ունենում է ՓԿՕԲՀ։

Այս հիվանդությունը սովորաբար զարգանում է սեռական կյանքով ապրող 20-24 տարեկան կանանց շրջանում։ ՓԿՕԲՀ վաղ ախտորոշումը և արդյունավետ բուժումը երաշխավորում է լիարժեք վերականգնում։

Ի՞նչ է ՓԿՕԲՀ

ՓԿՕԲՀ կնոջ փոքր կոնքի օրգաններից մեկի կամ մի քանիսի վարակային բորբոքումն է, որը կարող է ընդգրկել արգանդի պարանոցը, էնդոմետրիումը (արգանդի լորձաթաղանթ), ֆալոպյան փողերը կամ ձվարանները։

ՓԿՕԲՀ-ի պատճառը բակտերիային վարակն է, որը արգանդի պարանոցից տարածվում է դեպի վեր՝ տարածվելով կնոջ վերարտադրողական մյուս օրգանների վրա։ Վարակը կարող է լինել սեռական ճանապարհով փոխացվող (ավելի հաճախ՝ գոնորեա և քլամիդիա) կամ կինը կարող է վարակվել ծննդաբերելիս, հղիության ընդհատման միջամտությունների կամ ներարգանդային հակաբեղմնավորիչ պարույրների տեղադրման ժամանակ։

ՓԿՕԲՀ ախտանիշները և ախտորոշումը

Կնոջ համար շատ դժվար է հասկանալը, որ իր մոտ առկա է ՓԿՕԲՀ, քանի որ շատերի մոտ այս վիճակը որևէ նշանակալի գանգատ չի առաջացնում, հատկապես, եթե պատճառը քլամիդիային վարակն է։

Այնուամենայնիվ, ՓԿՕԲՀ-ի սուր նշանները կարող են ի հայտ գալ արագ և ներառել հետևյալը՝

Եթե ձեզ մոտ առկա է այս նշաններից որևէ մեկը, այցելեք ձեր բժշկին։

ՓԿՕԲՀ ախտորոշմանը կարող են օգնել հեշտոցային կամ պարանոցային քսուքների լաբորատոր հետազոտությունները, թեև գուցե այլ հետազոտություններ նույնպես պետք լինեն, հատկապես այն դեպքերում, երբ բացակայում են հիվանդության ախտանիշները։

ՓԿՕԲՀ բուժումը և կանխարգելումը

ՓԿՕԲՀ սովորաբար բուժվում է հակաբիոտիկներով. նման դեպքում բուժումը տևում է առնվազն 14 օր։ Բուժման ընթացքում դուք խորհուրդ կստանաք ժամանակավորապես դադարեցնելու սեռական հարաբերությունները։ Եթե խոսքը գնում է սեռավարակների մասին, ապա բուժում պետք է ստանաք և դուք, և ձեր սեռական զուգընկերը։

ՓԿՕԲՀ-ի բուժումը վաղ սկսելիս զգալի չափով նվազում է բարդությունների ռիսկը, ինչպիսիք են՝ անպտղություն, քրոնիկ որովայնային ցավեր, արտաարգանդային հղիություն (երբ պտուղը զարգանում է ոչ թե արգանդում, այլ ֆալոպյան փողերից մեկնումեկում), վիժում, վաղաժամ ծննդաբերություն և մեռելածնություն։

Մինչ օրս, պահպանակը մնում է սեռական ճանապարհով փոխանցվող հիվանդություններից (ՍՃՓՀ) և ՓԿՕԲՀ-ից պաշտպանվելու լավագույն միջոցը։ Եթե դուք սեռական ակտիվ կյանքով եք ապրում, ապա կարևոր է նաև ՍՃՓՀ նկատմամբ պարբերաբար հետազոտվելը, հատկապես գինեկոլոգիական միջամտությունից առաջ (ներարգանդային պարույրի տեղադրում, արհեստական վիժում և այլն)։

Հոդվածը վերանայվել է՝ 18-05-2019