Ախտորոշում - Կոնքային բորբոքային հիվանդություն

Չկա որևէ եզակի թեստ, որը կարող է ճշգրտորեն ախտորոշել փոքր կոնքի օրգանների բորբոքային հիվանդությունը (ՓԿՕԲՀ):

Փոխարենը, ձեր բժիշկը կհիմնվի տարբեր արդյունքների համակցության վրա:

• Ձեր հիվանդության պատմությունը (անամնեզ). ձեր բժիշկը, հավանաբար, կհարցնի ձեր սեռական սովորույթների, սեռական ճանապարհով փոխանցվող հիվանդությունների (ՍՃՓՀ) պատմության և ծնելիության վերահսկման եղանակի մասին:
• Գանգատներ և ախտանիշներ. տեղեկացրեք ձեր բժշկին ցանկացած բոլոր ախտանիշների մասին, որոնք դուք զգում եք, նույնիսկ եթե դրանք մեղմ են:
• Գինեկոլոգիական քննություն (ներզննում). գինեկոլոգիական ներզննման ընթացքում ձեր բժիշկը կստուգի ձեր փոքր կոնքի օրգանների ցավոտությունը և այտուցվածությունը: Ձեր բժիշկը նաև կարող է օգտագործել բամբակյա ծայրով զոնդեր՝ հեշտոցից և արգանդի վզիկից հեղուկ նմուշներ վերցնելու համար: Այս նմուշները լաբորատորիայում կհետազոտվեն վարակի նշանների և այնպիսի միկրոօրգանիզմների համար, ինչպիսիք են գոնորեան և քլամիդիան:
• Արյան և մեզի թեստեր. այս թեստերը կարող են նշանակվել՝ ստուգելու հղիության առկայությունը, հայտնաբերելու ՄԻԱՎ-ը և այլ ՍՃՓՀ-ները, ինչպես նաև չափելու լեյկոցիտների քանակը և վարակի կամ բորբոքման այլ մարկերները:
• Գերձայնային հետազոտություն (սոնոգրաֆիա). սա անվտանգ և անցավ հետազոտություն է, որն օգտագործում է ձայնային ալիքներ՝ ձեր վերարտադրողական օրգանների պատկերները ստեղծելու համար:

Եթե ախտորոշումը դեռ պարզ չէ, ձեզ կարող են անհրաժեշտ լինել լրացուցիչ հետազոտություններ:

• Լապարոսկոպիա. այս միջամտության ընթացքում բժիշկը ձեր որովայնի պատի փոքրիկ կտրվածքի միջով բարակ, լուսավորող գործիք է մտցնում ձեր որովայնի խոռոչ՝ ձեր փոքր կոնքի օրգանները դիտելու համար:
• Էնդոմետրիալ բիոպսիա. այս միջամտության ընթացքում ձեր բժիշկը բարակ խողովակ է մտցնում արգանդի մեջ՝ հեռացնելու արգանդի լորձաթաղանթի հյուսվածքի փոքր նմուշ: Նմուշառված հյուսվածքը ստուգվում է վարակի և բորբոքման նշանների համար: