Բուժում - Կոնքային բորբոքային հիվանդություն

Վաղ դեղորայքային բուժումը կարող է ձեզ ազատել փոքր կոնքի օրգանների բորբոքային հիվանդություն (ՓԿՕԲՀ)​ առաջացնող վարակից։

Այնուամենայնիվ, եթե ՓԿՕԲՀ-ն հասցրել է առաջացնել վերարտադրողական խողովակի վնասում կամ սպիական փոփոխություններ, դրանք այլևս անդառնալի են և դեղորայքային բուժմամբ չեն վերականգնվի:

ՓԿՕԲՀ բուժումը հաճախ ներառում է հետևյալը:

• Հակաբիոտիկներ. ձեր բժիշկը կնշանակի հակաբիոտիկների համակցություն՝ անմիջապես սկսելու համար: Ձեր լաբորատոր թեստի արդյունքները ստանալուց հետո բժիշկը կարող է փոփոխել ձեր նշանակումները, որ ընտրի վարակի պատճառներին համապատասխանող ամենահարմար հակաբիոտիկները: Երեք օր հետո դուք հավանաբար կայցելեք ձեր բժշկին, որ համոզվեք, որ բուժումն արդյունավետ է: Անպայման ընդունեք ձեր բոլոր դեղամիջոցներն այնպես, ինչպես նշանակել և հրահանգել է ձեր բժիշկը, նույնիսկ եթե մի քանի օր հետո ձեզ ավելի լավ զգաք:
• Բուժում ձեր սեռական զուգընկերոջ համար. սեռավարակով կրկնակի վարակումը կանխելու համար ձեր սեռական զուգընկերը կամ զուգընկերները նույնպես պետք է հետազոտվեն և բուժվեն: Վարակված գործընկերները կարող են որևէ նկատելի ախտանիշ չունենալ կամ որևէ գանգատ չներկայացնել:
• Սեռական կյանքի ժամանակավոր ընդմիջում. խուսափեք սեռական հարաբերությունից մինչև բուժման ավարտը և ախտանիշների վերացումը:

Եթե հղի եք, լուրջ հիվանդ եք, ունեք կասկածելի թարախակույտ կամ բերանով ընդունվող դեղամիջոցները արդյունք չեն տալիս, կարող է առաջանալ հոսպիտալացման և հիվանդանոցային բուժման անհրաժեշտություն: Հիվանդանոցում դուք կարող եք ստանալ ներերակային հակաբիոտիկներ, որոնք ձեզ ինքնազգացողության բարելավումից հետո կփոխարինվեն բերանային հաբերով կամ պատիճներով:

Հազվադեպ կարող է առաջանալ վիրահատության անհրաժեշտություն:

Այնուամենայնիվ, եթե թարախակույտը պատռվում է կամ սպառնում է պատռվել, ձեր բժիշկը կարող է դրենավորել այն: Ձեզ կարող է անհրաժեշտ լինել վիրահատություն նաև այն դեպքերում, եթե հակաբիոտիկների բուժումն անարդյունավետ է կամ ունեք կասկածելի ախտորոշում, օրինակ, երբ բացակայում են ՓԿՕԲՀ-ի գանգատներից կամ ախտանիշներից մեկը կամ մի քանիսը: