Պատճառներ - Պեպտիկ խոց

Պեպտիկ խոցն առաջանում է, երբ մարսողական խողովակի ​թթուն հյուծում և քայքայում ​է ստամոքսի կամ բարակ աղու ներքին մակերևույթը​:

Թթուն կարող է առաջացնել ցավոտ բաց վերք, որը կարող է արյունահոսել:

Մարսողական խողովակը ներսից պատված է լորձային շերտով, որը նորմայում պաշտպանում է թթվի գրգռող և քայքայիչ ազդեցությունից: Սակայն, եթե թթվի քանակն ավելանում է կամ պաշտպանիչ լորձի քանակը նվազում է, ձեզ մոտ կարող է խոց առաջանել:

Ամենատարածված պատճառները ներկայացված են ստորև:

• Բակտերիա. հելիկոբակտրի պիլորի (H. pylori) բակտերիաները սովորաբար ապրում են լորձային շերտում, որը ծածկում և պաշտպանում է ստամոքսը և բարակ աղին ներսից պատող հյուսվածքները: Հաճախ H. pylori բակտերիան որևէ խնդիր չի առաջացնում, սակայն կարող է զարգացնել ստամոքսի ներքին շերտի՝ լորձաթաղանթի բորբոքում և խոց: Դեռևս պարզ չէ, թե ինչպես է տարածվում H. pylori վարակը: Այն կարող է մարդուց մարդուն փոխանցվել սերտ շփման միջոցով, օրինակ՝ համբուրվելիս: Մարդիկ նաև կարող են H. pylori-ով վարակվել սննդի և ջրի միջոցով:
• Որոշ ցավազրկողների կանոնավոր օգտագործում. Ասպիրինը, ինչպես նաև որոշ ցավազրկողները, որոնք կոչվում են ոչ ստերոիդ հակաբորբոքային դեղամիջոցներ (ՈՍՀԲԴ), կարող են գրգռել կամ բորբոքել ձեր ստամոքսի և բարակ աղու լորձաթաղանթը: Այս դեղերի օրինակներից են՝ Իբուպրոֆեն (Ադվիլ, Մոտրին IB և այլն), Նապրոքսեն նատրիում (Ալեվե և այլն), Կետոպրոֆեն և այլն: Ացետամինոֆենը (Պարացետամոլ, Թայլենոլ և այլն) չի պատկանում այս խմբին:
• Այլ դեղամիջոցներ. ՈՍՀԲԴ–ների հետ միասին պեպտիկ խոցերի զարգացման ռիսկը նաև զգալիորեն բարձրացնում են ստերոիդները, հակամակարդիչները, ցածր դեղաչափով Ասպիրինը, սերոտոնինի ետզավթման ընտրողական արգելակիչները (ՍԵՀԱ), Ալենդրոնատը (Ֆոսամաքս) և Ռիզեդրոնատը (Ակտոնել)։

Ռիսկի գործոններ

Ի լրումն ՈՍՀԲԴ-ների ընդունման հետ կապված ռիսկերի, դուք կարող եք ունենալ պեպտիկ խոցի առաջացման ռիսկի բարձրացում, եթե՝

• ծխում եք. ծխախոտը կարող է մեծացնել պեպտիկ խոցի ռիսկն այն մարդկանց մոտ, ովքեր վարակված են H. pylori-ով
• ալկոհոլ եք խմում. ալկոհոլը կարող է գրգռել և էրոզացնել ստամոքսի լորձաթաղանթը և մեծացնում է արտադրվող ստամոքսի թթվի քանակը
• ունեք անկառավարելի սթրես
• ուտում եք կծու մթերքներ:

Առանձին վերցրած այս գործոնները պեպտիկ խոց չեն առաջացնում, սակայն կարող են ավելի վատթարացնել առկա խոցը կամ դժվարացնել բուժումը: