Ինքնօգնություն - Պեպտիկ խոց

Պեպտիկ խոցի հետ կապված ցավերը կարելի է որոշ չափով մեղմացնել հետևյալ միջոցներով:

• Մտածեք ցավազրկողները փոխելու մասին. եթե կանոնավոր օգտագործում եք ցավազրկող դեղամիջոցներ, հարցրեք բժշկին, թե հնարավոր է արդյոք դրանք փոխարինել Ացետամինոֆենով (Պարացետամոլ, Թայլենոլ և այլն):
• Կառավարեք սթրեսը. սթրեսը կարող է վատթարացնել պեպտիկ խոցի գանգատներն ու ախտանիշները: Փորձեք պարզել սթրեսի աղբյուրները և արեք ամեն հնարավորը պատճառները վերացնելու համար: Սթրեսի որոշ տեսակներից հնարավոր չէ խուսափել, սակայն կարող եք սովորել, թե ինչպես դիմակայել վնասակար հուզական լարվածությունը վարժանքների, ընկերական շրջապատում ժամանակ անցկացնելու և այլ միջոցներով:
• Մի՛ ծխեք. ծխախոտի օգտագործումը կարող է բացասաբար ազդել ստամոքսի պաշտպանական լորձաթաղանթի վրա և ձեզ դարձնել խոցի զարգացման նկատմամբ ավելի «խոցելի»: Ծխախոտը նաև բարձրացնում է ստամոքսաթթվի արտադրությունը:
• Սահմանափակեք կամ բացառեք ալկոհոլը. ալկոհոլի չափից ավելի օգտագործումը կարող է գրգռել և վնասել (էրոզիայի ենթարկել) ստամոքսի և աղիների լորձաթաղանթը՝ առաջացնելով բորբոքում և արյունահոսություն:

Այլընտրանքային բժշկություն

Բիսմութ պարունակող արտադրանքները կարող են օգնել պեպտիկ խոցերի ախտանիշների մեղմացմանը: Կան նաև որոշ ապացույցներ, որ ցինկը կարող է օգնել խոցերի լավացմանը: Մշտադալար թփերում պարունակվող մաստիկայի փոշին նույնպես կարող է օգնել բարելավելու ախտանիշները և արագացնել պեպտիկ խոցերի լավացումը:

Որոշ դեղատոմս չպահանջող և ալյընտրանքային դեղամիջոցներ կարող են օգտակար լինել, սակայն արդյունավետության վերաբերյալ տվյալները բացակայում են: Հետևաբար, դրանք խորհուրդ չեն տրվում որպես պեպտիկ խոցի առաջնային բուժում: