Ախտանիշներ - Պերիմենոպաուզա

Դաշտանադադարի (մենոպաուզա) անցման ընթացքում ձեր օրգանիզմում կարող են տեղի ունենալ որոշ թեթև և որոշ ոչ այնքան թեթև փոփոխություններ:

Այս անցման շրջանում դուք կարող եք առնչվել հետևյալ գանգատների և ախտանիշների հետ:

• Անկանոն դաշտաններ. երբ ձվազատումը (օվուլյացիա) դառնում է ավելի անկանխատեսելի, դաշտանների միջև ընկած ժամանակահատվածը կարող է դառնալ ավելի երկար կամ ավելի կարճ, դաշտանը կարող է դառնալ թույլից մինչև առատ, և դուք կարող եք բաց թողնել որոշ դաշտաններ: Եթե ունեք ձեր դաշտանային ցիկլի յոթ օր կամ ավելի տևողությամբ մշտական փոփոխություն, հավանաբար վաղ հարդաշտանադադարի փուլում եք, իսկ եթե դաշտանների միջև տևողությունը հասնում է 60 օր կամ ավելի, ապա, ամենայն հավանականությամբ, գտնվում եք ուշ հարդաշտանադադարի մեջ:
• Ջերմահորդանքներ և քնի հետ կապված խնդիրներ. հարդաշտանադադարի ընթացքում ջերմահորդանքը տարածված երևույթ է: Ուժգնությունը, տևողությունը և հաճախականությունը տարբեր են: Քնի հետ կապված խնդիրները հաճախ առաջանում են ջերմահորդանքների կամ գիշերային քրտնարտադրության պատճառով, սակայն երբեմն քունը նույնիսկ առանց դրանց դառնում է անկանխատեսելի:
• Տրամադրության փոփոխություններ. հարդաշտանադադարի ընթացքում կարող են զարգանալ տրամադրության անկայունություն, դյուրագրգռություն կամ դեպրեսիայի ռիսկի բարձրացում: Այս ախտանիշների պատճառը կարող է լինել քնի խանգարումը, որը կապված է ջերմահորդանքների հետ: Տրամադրության փոփոխությունները կարող են պայմանավորված լինել նաև այն գործոններով, որոնք կապված չեն հարդաշտանադադարի հորմոնային փոփոխությունների հետ:
• Հեշտոցային և միզապարկի խնդիրներ. երբ էստրոգենի մակարդակը նվազում է, ձեր հեշտոցային հյուսվածքները կարող են կորցնել բնական օծումը (լուբրիկացիա) և առաձգականությունը (էլաստիկություն)՝ ցավոտ դարձնելով սեռական հարաբերությունը: Էստրոգենի ցածր մակարդակը նաև կարող է ձեզ ավելի խոցելի դարձնել միզուղիների կամ հեշտոցային վարակների նկատմամբ: Հյուսվածքների տոնուսի կորուստը կարող է նպաստել անմիզապահությանը:
• Պտղաբերության նվազում. երբ ձվազատումը (օվուլյացիա) դառնում է անկանոն, ձեր հղիանալու ունակությունը նվազում է: Այնուամենայնիվ, քանի դեռ ունեք դաշտան, հղիությունը դեռևս հնարավոր է: Եթե ցանկանում եք խուսափել հղիությունից, օգտագործեք հակաբեղմնավորիչ միջոցներ, քանի դեռ 12 ամիս անընդմեջ դաշտան չեք ունեցել:
• Սեռական գործունեության փոփոխություններ. հարդաշտանադադարի ընթացքում սեռական գրգռումը և ցանկությունը կարող են փոխվել: Սակայն, եթե մինչև դաշտանադադարը ունեցել եք բավարար սեռական կյանք, ապա դա, հավանաբար, կշարունակվի մինչև դաշտանադադարը և դրանից հետո:
• Ոսկրային հյուսվածքի կորուստ. էստրոգենի մակարդակի նվազման դեպքում դուք սկսում եք ավելի արագ կորցնել ոսկրային հյուսվածք, քան այն փոխարինում եք, ինչը մեծացնում է օստեոպորոզի վտանգը՝ հիվանդություն, որը ձեր ոսկրերը դարձնում է փխրուն:
• Խոլեսթերինի մակարդակի փոփոխություն. էստրոգենի մակարդակի նվազումը կարող է հանգեցնել արյան խոլեսթերինի մակարդակի անբարենպաստ փոփոխությունների, ներառյալ ցածր խտության լիպոպրոտեիդի (ՑԽԼ) խոլեսթերինի («վատ» խոլեսթերինի) բարձրացումը, որը նպաստում է սրտային հիվանդության բարձրացած ռիսկին: Միևնույն ժամանակ, բարձր խտության լիպոպրոտեիդի (ԲԽԼ) խոլեսթերինը՝ «լավ» խոլեսթերինը, շատ կանանց մոտ տարիքի հետ նվազում է, ինչը նույնպես մեծացնում է սրտային հիվանդության ռիսկը։

Ե՞րբ դիմել բժշկին

Որոշ կանայք հարդաշտանադադարի ախտանիշների կապակցությամբ դիմում են բժշկին: Սակայն մյուսները կամ հանդուրժում են փոփոխությունները կամ էլ պարզապես չեն զգում այնքան արտահայտված ախտանիշներ, որ ուշադրության կարիք ունենան: Ախտանշանները կարող են լինել թեթև և աստիճանաբար ի հայտ գալ, ուստի դուք սկզբում չեք կարող հասկանալ, որ դրանք բոլորը կապված են նույն բանի՝ դաշտանադադարի անցման հորմոնների տատանումների հետ:

Եթե ունեք ախտանիշներ, որոնք խանգարում են ձեր կյանքին կամ բարեկեցությանը, ինչպիսիք են ջերմահորդանքները, տրամադրության փոփոխությունները կամ սեռական գործունեության փոփոխությունները, դիմեք ձեր բժշկին: