Բուժում - Պերիմենոպաուզա

Հարդաշտանադադարի ախտանիշների մեղմացման համար հաճախ օգտագործվում են դեղեր:

• Հորմոնային բուժում. համակարգային (ընդհանուր ազդեցության) էստրոգենային բուժումը, որը նշանակվում է հաբի, մաշկային սպեղանու, սփրեյի, գելի կամ նրբաքսուքի (կրեմ) ձևով, մնում է հարդաշտանադադարային և դաշտանադադարային ջերմահորդանքները և գիշերային քրտնարտադրությունը թեթևացնող ամենաարդյունավետ բուժման տարբերակը: Կախված ձեր անձնական և ընտանեկան պատմությունից՝ ձեր բժիշկը կարող է առաջարկել էստրոգեն նվազագույն դեղաչափով, որն անհրաժեշտ է ձեզ ախտանշանները մեղմացնելու համար: Եթե ձեր արգանդը հեռացված չէ, Էստրոգենից բացի ձեզ անհրաժեշտ կլինի նաև Պրոգեստին: Համակարգային Էստրոգենը կարող է օգնել ոսկրային հյուսվածքի կորստի կանխարգելմանը:
• Հեշտոցային էստրոգեն. Էստրոգենը կարող է ուղղակիորեն ներմուծվել հեշտոցի մեջ՝ որպես հեշտոցային դեղահատ, օղակ կամ նրբաքսուք (կրեմ): Այս բուժումն ազատում է Էստրոգենի ընդամենը շատ փոքր քանակություն, որը ներծծվում է հեշտոցային հյուսվածքի կողմից: Այն կարող է օգնել թեթևացնելու հեշտոցային չորությունը, սեռական հարաբերության հետ կապված անհարմարավետությունը և որոշ միզային ախտանիշներ:
• Հակադեպրեսանտներ. որոշ հակադեպրեսանտներ, որոնք կապված են սերոտոնինի ետզավթման ընտրողական արգելակիչներ կոչվող դեղերի դասի հետ, կարող են թուլացնել դաշտանադադարային ջերմահորդանքները: Հակադեպրեսանտը ջերմահորդանքների կառավարման համար կարող է օգտակար լինել այն կանանց համար, ովքեր առողջական պատճառներով չեն կարող ընդունել Էստրոգեն կամ ովքեր տրամադրության խանգարման պատճառով հակադեպրեսանտի կարիք ունեն:
• Գաբապենտին (Նեյրոնտին): Գաբապենտինը հավանության է արժանացել ցնցումները բուժելու համար, սակայն նաև օգնում է ջերմահորդանքների թուլացմանը: Այս դեղն օգտակար է այն կանանց համար, ովքեր առողջական պատճառներով չեն կարող օգտագործել էստրոգենային բուժում, ինչպես նաև նրանց համար, ովքեր ունեն նաև միգրեն:

Նախքան բուժման որևէ տեսակի վերաբերյալ որոշում կայացնելը, խոսեք բժշկի հետ ձեր տարբերակների և յուրաքանչյուրի հետ կապված ռիսկերի ու օգուտների մասին: Վերանայեք ձեր տարբերակներն ամեն տարի, քանի որ ձեր կարիքները և բուժման տարբերակները կարող են փոխվել: