ԾԶՀ. պատճառներ

1 րոպե

Ծայրամասային զարկերակների հիվանդությունը (ԾԶՀ) հաճախ առաջանում է զարկերակների պատերին ճարպային, խոլեսթերին պարունակող նստվածքների (վահանիկների) կուտակումից:

Այս գործընթացը կոչվում է աթերոսկլերոզ: Այն նվազեցնում է արյան հոսքը զարկերակների միջոցով:

Աթերոսկլերոզն ազդում է ամբողջ օրգանիզմի զարկերակների վրա: Երբ այն զարգանում է վերջույթներին արյուն մատակարարող անոթներում, առաջացնում է ԾԶՀ։ Երբ ոտքի մկանները կծկվում ու աշխատում են, օրինակ՝ քայլելիս, արյան պահանջարկը բարձրանում է մինչև 10 անգամ, սակայն, նեղացած զարկերակները չեն հասցնում բավարարել մկանների համարժեք արյունամատակարարումը, որն էլ առաջացնում է ընդմիջվող կաղություն և ԾԶՀ-ի մյուս ախտանիշները:

ԾԶՀ-ի ավելի քիչ տարածված պատճառները ներառում են՝

• արյունատար անոթների բորբոքում
• ձեռքերի կամ ոտքերի վնասվածք
• մկանների կամ կապանների փոփոխություններ
• ճառագայթման ազդեցություն:

Ռիսկի գործոններ

Ծխելը կամ շաքարային դիաբետը զգալիորեն մեծացնում են ԾԶՀ-ի զարգացման ռիսկը։ Այլ բաները, որոնք կարող են մեծացնել ԾԶՀ-ի ռիսկը, ներառում են՝

• ԾԶՀ-ի, սրտային հիվանդության կամ ինսուլտի ընտանեկան պատմություն (անամնեզ)
• բարձր արյան ճնշում (հիպերտենզիա)
• բարձր խոլեսթերին (hաշվարկված է, որ արյան խոլեսթերինի մակարդակի յուրաքանչյուր 0,25 մմոլ/լ աճը ԾԶՀ-ի հավանականությունը բարձրացնում է շուրջ 10%-ով)
• հոմոցիստեին կոչվող ամինաթթվի բարձր մակարդակ, որը նաև մեծացնում է սրտի իշեմիկ հիվանդության ռիսկը
• մեծ տարիք, հատկապես 65-ից հետո կամ 50-ից հետո, եթե ունեք աթերոսկլերոզի ռիսկի գործոններ
• գիրություն՝ մարմնի զանգվածի գործակիցը 30-ից բարձր: