Ծայրամասային զարկերակների հիվանդություն. ախտանիշներ

Ծայրամասային զարկերակների հիվանդություն. ախտանիշներ

Ծայրամասային զարկերակների հիվանդությամբ բազմաթիվ մարդիկ որևէ գանգատ չեն ներկայացնում կամ ունեն թեթև ախտանիշներ, սակայն որոշ մարդկանց մոտ ի հայտ է գալիս քայլելես ոտքի ցավեր (ընդմիջվող կաղություն):

Ծայրամասային զարկերակների հիվանդությանը բնորոշ ընդմիջվող կաղությունը ներառում է ոտքերի մկանների ցավը կամ ջղաձգումը, որն առաջանում է որևէ գործողություն կատարելիս, օրինակ՝ քայլելիս, աստիճաններով բարձրանալիս և այլն, սակայն անհետանում է կանգ առնելուց և մի քանի րոպե ոտքերին «հանգիստ» տալուց հետո: Ցավի տեղակայումը կախված է խցանված կամ նեղացած զարկերակի դիրքից: Ամենատարածված տեղակայումը սրունքի ցավն է, որը երբեմն կարող են բարձրանալ դեպի ազդր։

Ընդմիջվող կաղության ծանրությունը կարող են լինել տարբեր՝ սկսած թեթև անհարմարավետությունից մինչև տանջալի ցավեր: Ծանր ընդմիջվող կաղությունը կարող է կտրուկ դժվարացնել քայլելը կամ որևէ այլ տիպի ֆիզիկական գործ անելը։

Ծայրամասային զարկերակների հիվանդության ախտանիշներից են՝

  • մեկ կամ զույգ ազդրերի կամ սրունքների մկանների ցավոտ ջղաձգում, որն առաջանում է որոշ ակտիվությունից հետո, օրինակ՝ քայլելիս կամ աստիճաններով բարձրանալիս
  • ոտքի թմրածություն կամ թուլություն
  • ոտքի ստորին շրջանի կամ ոտնաթաթի սառնություն, հատկապես, երբ համեմատվում է մյուս կողմի հետ
  • ոտքերի, ոտնաթաթերի կամ մատների վրա չլավացող խոցեր (բաց վերքեր)
  • ոտքերի կամ ոտնաթաթերի գույնի փոփոխություններ (գունատություն կամ կապտավուն երանգ)
  • ոտքերի կամ սրունքների մազաթափություն կամ մազերի աճի դանդաղում
  • ոտքի եղունգների աճի դանդաղում, փխրունացում և կոտրտվածություն
  • ոտքերի մաշկի փայլուն տեսք
  • ոտքերի կամ ոտնաթաթերի վրա անոթազարկի (պուլս) թուլացում կամ անհետացում
  • ոտքերի մկանների հյուծում (ատրոֆիա)
  • տղամարդկանց մոտ՝ էրեկտիկ դիսֆունկցիա (իմպոտենցիա)
  • ձեռքերն օգտագործելիս (կարուձև, գրում կամ այլ գործեր) ցավերի առաջացում, օրինակ՝ ծակծկոցներ և ջղաձգում։

Եթե հիվանդությունը հարաճուն զարգանում է, ցավը կարող է ի հայտ գալ նաև հանգիստ վիճակում կամ պառկած դիրքում: Այն կարող է այնքան ուժգնանալ, որ խանգարի քունը: Անկողնու կողքից ոտքը կախելը կամ սենյակում քիչ քայլելը կարող է ժամանակավորապես մեղմացնելե ցավը:

Ե՞րբ դիմել բժշկին

Եթե ունեք ոտքի ցավ, թմրածություն կամ այլ ախտանիշներ, մի կարծեք, թե այս գանգատները տարիքի հետ կապված նորմալ երևույթներ են: Իրականում առողջ մարդկանց մոտ ոտքերի ցավը չի կարող դառնալ ակտիվ կյանքի «անբաժան» երևույթը։ Պայմանավորվեք և այցելեք բժշկին:

Նույնիսկ եթե չեք նշում ծայրամասային զարկերակների հիվանդության որևէ ախտանիշ, բժիշկը կարող է առաջարկել սքրինինգային հետազոտություններ, եթե՝

Ե՞րբ դիմել անհետաձգելի բուժօգնության

Կան որոշ նշաններ, որոնք կարող են վկայել ոտքի արյունամատակարարման կտրուկ վատթարացման մասին։ Նման դեպքերում պետք է շտապ դիմել բժշկին կամ այցելել մոտակա անոթային վիրաբուժական կենտրոն (կամ նման բաժանմունք կամ ծառայություն ունեցող հիվանդանոց)։

Անհետաձգելի ուշադրություն և գործողություններ պահանջող ախտանիշներից են՝

  • ախտահարված ոտքի մկանների շարժման անհնարինություն (մկանների «քարացում»)
  • ախտահարված ոտքի շրջանում այրող կամ ծակծկող զգացողությունների առաջացում
  • ոտքի մատների հանկարծակի կապտում
  • ոտնաթաթերի և ավելի վեր ընկած շրջանի մաշկի սառնություն և թմրածություն, կարմրում և սևացում կամ սաստիկ ցավերով ուղեկցվող այտուցվածություն
  • ոտնաթաթերում կամ այլ շրջաններում առկա խոցերից տհաճ հոտով թարախային արտադրություն։

Հոդվածը վերանայվել է՝ 28-05-2021