Ծայրամասային զարկերակների հիվանդություն. բուժում

Ծայրամասային զարկերակների հիվանդություն. բուժում

Աթերոսկլերոզի մյուս դրսևորումների նման ծայրամասային զարկերակների հիվանդության բուժումն ուղղված է հիվանդության զարգացումն ու բարդությունները կանխարգելելուն, ինչպես նաև հիվանդի կայքնի որակը բարելավելուն։

Տարբերում են ծայրամասային զարկերակների հիվանդության բուժման երկու հիմնական ուղղություններ՝

  • ապրելակերպի փոփոխություններ՝ առողջացում, որը կարող է մեղմացնել հիվանդության ախտանիշները և նվազեցնել լուրջ բարդությունների ռիսկը
  • դեղերի ընդունում՝ ուղղված հիվանդության պատճառների մեղմացմանը, ինչպես նաև բարդությունների կանխարգելմանը։

Պետք է նկատի ունենալ, որ այս երկու մոտեցումները կարող են օգտակար լինել նաև աթերոսկլերոզով պայմանավորված սրտանոթային հիվանդությունների և ինսուլտի ռիսի նվազեցմանը։

Որպես բուժման մեթոդ, վիրահատությունը կարող է քննարկվել այն դեպքում, երբ վերոնշյալ երկու մեթոդներով որևէ ցանկալի արդյունք չի ստացվում կամ հիվանդությունը բարդացել է ստորին վերջույթի ծանր և անդառնալի իշեմիայով։

Ապրելակերպի բարեփոխումներ

Ծայրամասային զարկերակների հիվանդության ժամանակ ապրելակերպի երկու ամենաարդյունավետ փոփոխությունները ծխախոտից հրաժարվելն է և ֆիզիկական ակտիվությունը բարձրացնելը։

Ծխախոտից հրաժարում

Եթե դուք ծխող եք, ապա օր առաջ հրաժարվեք դրանից։

  • Եթե ծխախոտից հրաժարվելն ինքնուրույն չի ստացվում, ապա խորհուրդ է տրվում օգտագործել հակածխախոտային որևէ արդյունավետ բուժում, օրինակ՝ նիկոտին-փոխարինող բուժում կամ Բուպրոպիոն (որը թուլացնում է ծխելու ցանկությունը՝ հակումը)։
  • Եթե դուք ցանկանում եք դադարեցնել ծխելը, ապա կարելի է այցելել ձեր բժշկին և այս թեմայի շուրջ լսել նրա խորհուրդները։

Ֆիզիկական վարժանքներ

Կան բազմաթիվ հետազոտություններ, որոնք վկայում են, որ ֆիզիկական ակտիվ առօրյան օգնում է ծայրամասային զարկերակների հիվանդության ախտանիշների մեղմացմանը և սրացման դեպքերի հազվադեպացմանը։ Ընդ որում, ֆիզիկական կանոնավոր վարժանքները նվազեցնում են նաև սրտանոթային հիվանդությունների զարգացման ռիսկը։

Օրինակ, հետազոտություններով պարզվել է, որ 6-ամսյա կանոնավոր ֆիզիկական վարժանքների շնորհիվ՝

  • դուք կարող եք քայլել ավելի երկար տարածություններ՝ առանց ոտքերում ցավ զգալու
  • կարող է բարելավվել ձեր կոճ-բազկային գործակիցը (որն օգտագործվում է ստորին վերջույթի արյան շրջանառությունը գնահատելիս)։

Գերադասելի ֆիզիկական վարժանքը քայլքն է։ Սովորաբար խորհուրդ է տրվում քայլել այնքան ժամանակ և այնքան երկար, մինչև ոտքերում տեղակայված ցավերը դառնան անդիմադրելի։ Երբ ցավերը սաստկանում են, դուք կարող եք հանգստանալ՝ մինչև ցավերը անհետանան կամ մեղմանան, և շարունակեք քայլելը։ Այսպիսի «կանգնել-սկսել» մեթոդը կարելի է կիրառել օրվա մեջ այնքան, մինչև քայլելու ժամանակահատվածը դառնա 30 րոպե։

Ֆիզիկական ակտիվության բարձրացնելը միայն առաջին մի քանի օրը կարող է թվալ անիրականանալի, որից հետո դուք աստիճանաբար կբարելավեք ձեր նախորդ օրերի «անձնական ցուցանիշները»։

Դեղեր

Ծայրամասային զարկերակների հիվանդության բուժման մեջ բժիշկը կարող է նշանակել տարբեր դեղեր, որոնք մի կողմից ուղղված են ձեր գանգատները մեղմացնելուն, իսկ մյուս կողմից՝ հիվանդության բարդությունները, այդ թվում՝ սրտանոթային հիվանդությունների զարգացումը կանխարգելելուն։

Ստատիններ

Եթե արյան լաբորատոր հետազոտությամբ պարզվում է, որ ձեր ՑԽԼ-ն («վատ խոլեսթերին») բարձր է, բժիշկը կարող է ձեզ նշանակել «ստատիններ» խմբի դեղերից մեկնումեկը։

Ստատինները նվազեցնում են լյարդի կողմից ՑԽԼ-ի արտադրությունը։

Արյան ճնշումը կարգավորղ դեղեր

Հակահիպերտենզիվ (գերճնշումային) դեղերը նշանակվում են բարձր արյան ճնշումը կարգավորելու համար։

Այս խմբի դեղերը բժիշկը հավանաբար կնշանակի այն դեպքում, եթե ձեզ մոտ գրանցվի 140/90 մմ ս.ս. կամ ավելի բարձր ճնշում և դուք չունենաք դիաբետ, կամ եթե ունենաք դիաբետ և ձեզ մոտ գրանցվի 130/80 մմ ս.ս. կամ ավելի բարձր ճնշում:

Ներկայում ամենալայն կիրառությունը ստացած հակահիպերտենզիվ դեղերը պատկանում են անգիոտենզին փոխարկող ֆերմենտների արգելակիչների կամ անգիոտենզին-2 ընկալիչների ներհակորդների խմբին։

Նկատի ունեցեք, որ զարկերակային ճնշման դեղերն անվնաս չեն և պետք է նշանակվեն և հսկսվեն միայն ձեր բժշկի կողմից։

Հակաագրեգանտներ

Աթերոսկլերոզի ամենամեծ հնարավոր վտանգն այն է, որ զարկերակի պատին կպած աթերոմայի («վահանիկ» կամ «թիթեղիկ») մի փոքր մասնիկ կարող է մասամբ պոկվել այդ պատից, որն էլ կարող է դառնալ տվյալ շրջանում արյան մակարդուկի (թրոմբ) առաջացման և մեծացման պատճառ։

Երբ արյան մակարդուկն առաջանում է սրտամկանը արյունամատակարարող պսակային զարկերակի լուսանցքում, կարող է զարգանալ սրտամկանի ինֆարկտ: Նույն կերպ, ուղեղի զարկերակներում խցանող թրոմբ առաջանալիս զարգանում է իշեմիկ ինսուլտ։

Արյան մակարդուկների առաջացման վտանգը նվազեցնելու համար բժիշկը կարող է ձեզ նշանակել հակաագերգանտային որևէ դեղ, որն արգելակում է թրոմբոցիտների՝ միմյանց միաձուլվելու գործընթացը՝ դրանով իսկ նվազեցնելով աթերոմայի պոկվելուց հետո նույն տեղում մակարդուկի առաջացման ռիսկը։

Որպես հակաագրեգանտային դեղ, ավելի հաճախ նշանակվում է ցածր դեղաչափով Ասպիրին (օրական ոչ ավելի, քան 75 մգ)։

Ասպիրինի ամենահաճախ հանդիող կողմնակի ազդեցություններն են՝

  • ստամոքսի կամ աղիների գրգռում
  • մարսողության խանգարումներ
  • սրտխառնոց։

Եթե Ասպիրինը ձեզ հակացուցված է (օրինակ՝ նշում եք խոցային հիվանդություն կամ ալերգիա ասպիրինի նկատմամբ), բժիշկը կարող է նշանակել մեկ այլ հակաագրեգանտային դեղ, օրինակ՝ Կլոպիդոգրել։

Սիլոստազոլ

Այս դեղը նվազեցնում է արյան մակարդելիությունը և լայնացնում ստորին վերջույթների զարկերակները՝ նպաստելով արյան հոսքի բարելավմանը։

Սիլոստազոլ խորհուրդ չի տրվում հղիներին և կրծքով կերակրող մայրերին։

Վիրահատական միջամտություններ

Շունտավորումը անոթային վիրահատություն է, որի դեպքում մարմնի այլ շրջանից վերցվում է չվնասված անոթ և տեղադրվում է խցանված անոթը շրջանցելու համար նպաստավոր շրջանում։ Որոշ դեպքերում որպես շունտ կարող է օգտագործվել նաև պլաստիկ խողովակը («արհեստական անոթ»)։

Անգլիոպլաստիկան կամ ստենտավորումը վիրահատական միջամտություն է, որի նպատակը խցանված անոթով արյան հոսքը վերականգնումն է։ Այն սովորաբար իրականացվում է ախտահարված անոթի մեջ ներմուծելով հատուկ ճկուն բարակ խողովակ, որի ազատ ծայրին կա հատուկ «փչվող բալոն» («բալոնային կաթետեր»)։ Վերջինիս միջոցով լայնացվում է խցանված զարկերակը և ըստ անհրաժեշտության լուսանցքում տեղադրվում չնեղացող զսպանակ՝ ստենտ։

Հոդվածը վերանայվել է՝ 14-05-2020