Պատճառներ - Պնևմոնիա

Բազմաթիվ միկրոօրգանիզմներ կարող են առաջացնել թոքաբորբ:

Ամենատարածվածը մեր շնչած օդում առկա բակտերիաներն ու վիրուսներն են: Օրգանիզմը սովորաբար կանխում է այս մանրէներով թոքերի վարակումը: Բայց երբեմն այդ մանրէները կարող են ճնշել ձեր իմունային համակարգը, նույնիսկ եթե որևէ այլ առողջական խնդիր չունեք:

Թոքաբորբը դասակարգվում է ըստ մանրէների տեսակների, որոնք առաջացնում են այն և ըստ նրա, թե որտեղ եք վարակվել:

Համայնք-ձեռքբերված կամ արտահիվանդանոցային թոքաբորբ

Սա թոքաբորբի ամենատարածված տեսակն է: Այն առաջանում է հիվանդանոցներից կամ առողջապահական այլ հաստատություններից դուրս:

Թոքաբորբի այս տեսակը կարող է առաջանալ հետևյալ պատճառներով:

• Բակտերիաներ. բազմաթիվ երկրներում բակտերիալ թոքաբորբի ամենատարածված պատճառը Streptococcus pneumoniae բակտերիան է: Թոքաբորբի այս տեսակը կարող է առաջանալ ինքնուրույն կամ մրսածությունից կամ գրիպից հետո: Այն կարող է ախտահարել թոքի մի մասը (բիլթ)՝ առաջացնելով կրուպոզ (բլթային, լոբար) թոքաբորբ:
• Բակտերիատիպ միկրոօրգանիզմներ. Mycoplasma pneumoniae-ն նույնպես կարող է առաջացնել թոքաբորբ: Այն սովորաբար ընթանում է ավելի մեղմ ախտանիշներով, քան թոքաբորբի մյուս տեսակները և սովորաբար չի պահանջում անկողնային ռեժիմ, ուստի ստացել է «քայլող թոքաբորբ» ոչ պաշտոնական անվանումը:
• Սնկիկներ (սնկեր). թոքաբորբի այս տեսակն առավել հաճախ հանդիպում է քրոնիկ առողջական խնդիրներ կամ թուլացած իմունային համակարգ ունեցող մարդկանց և միկրոօրգանիզմների մեծ քանակներ ներշնչած մարդկանց մոտ: Ախտածին սնկիկները կարող են հայտնաբերվել հողի կամ թռչնաղբի մեջ և տարբերվում են՝ կախված աշխարհագրական դիրքից:
• Վիրուսներ, ներառյալ COVID-19. մրսածություն և գրիպ առաջացնող որոշ վիրուսներ կարող են առաջացնել թոքաբորբ: Ընդունված է, որ թոքաբորբերի բոլոր դեպքերի շուրջ կեսի պատճառը վիրուսային վարակն է։ Վիրուսները 5 տարեկանից փոքր երեխաների շրջանում թոքաբորբի ամենատարածված պատճառն են: Վիրուսային թոքաբորբը սովորաբար ունի թեթև ընթացք, բայց որոշ դեպքերում կարող է դառնալ շատ ծանր: COVID-19–ը կարող է առաջացնել թոքաբորբ, որոշ դեպքերում՝ ծանր ընթացքով։

Հիվանդանոց–ձեռքբերված կամ հիվանդանոցային թոքաբորբ

Որոշ մարդիկ թոքաբորբով հիվանդանում են մեկ այլ հիվանդության պատճառով հիվանդանոցում գտնվելու ժամանակ: Հիվանդանոցային թոքաբորբը կարող է ավելի ծանր ընթացք ունենալ, քանի որ այն առաջացնող բակտերիաները կարող են հակաբիոտիկների նկատմամբ ավելի կայուն լինել և մարդիկ, ովքեր դրանցով հիվանդանում են, արդեն հիվանդ են: Անհետաձգելի բուժօգնության և ռեանիմացիայի բաժանմունքներում հաճախ օգտագործվող շնչառական ապարատներին «միացված» մարդիկ ենթարկվում են թոքաբորբի այս տեսակի ավելի բարձր ռիսկի:

Առողջապահական-ձեռքբերված թոքաբորբ

Սա թոքի բակտերիալ վարակ է, որը առաջանում է երկարատև խնամքի հաստատություններում ապրող կամ ամբուլատոր կլինիկաներում (օրինակ՝ երիկամային դիալիզի կենտրոններ) բուժում ստացող մարդկանց մոտ: Ինչպես հիվանդանոցային, այնպես էլ առողջապահական ձեռք բերված թոքաբորբը կարող է առաջանալ այնպիսի բակտերիաների պատճառով, որոնք հակաբիոտիկների նկատմամբ ավելի կայուն են:

Ասպիրացիոն թոքաբորբ

Ասպիրացիոն թոքաբորբ զարգանում է, երբ մթերքը, հեղուկը, փսխման զանգվածները կամ թուքը հոսում են թոքեր: Ասպիրացիան ավելի հավանական է, երբ որևէ պատճառով նորմալ փսխման ռեֆլեքսը խանգարված է, օրինակ՝ գանգուղեղային տրավմա, կլման խնդիրներ կամ ալկոհոլի և թմրամիջոցների չափից ավելի օգտագործում:

Ռիսկի գործոններ

Թոքաբորբ կարող է առաջանալ յուրաքանչյուրի մոտ, սակայն ամենաբարձր ռիսկի ենթարկվող երկու տարիքային խմբերը երկուսն են՝

• 2 տարեկան կամ ավելի փոքր երեխաներ
• 65 տարեկան և ավելի մեծ չափահասներ։

Այլ ռիսկի գործոնները ներառում են հետևյալը։

• Հոսպիտալացված լինելը. թոքաբորբի ռիսկն ավելի բարձր է, եթե բուժում եք ստանում հիվանդանոցի վերակենդանացման կամ անհետաձգելի բուժօգնության բաժանմունքում, հատկապես, եթե ձեզ միացրել են շնչառության օժանդակ սարք:
• Քրոնիկ հիվանդություն. դուք ավելի հավանական է, որ հիվանդանաք թոքաբորբով, եթե ունեք ասթմա, թոքերի քրոնիկ օբստրուկտիվ հիվանդություն (ԹՔՕՀ) կամ սրտային հիվանդություն:
• Ծխելը. ծխելը վնասում է ձեր օրգանիզմի բնական պաշտպանությունը թոքաբորբ առաջացնող բակտերիաներից և վիրուսներից:
• Թուլացած կամ ճնշված իմունային համակարգ. ռիսկի խմբում այն մարդիկ են, ովքեր ունեն ՄԻԱՎ, ենթարկվել են օրգանների փոխպատվաստման, ստանում են քիմոթերապիա կամ երկար ժամանակ ընդունում են ստերոիդներ։