Նույնիսկ բուժման դեպքում թոքաբորբ ունեցող որոշ մարդկանց մոտ, հատկապես, եթե նրանք ներկայացնում են «բարձր ռիսկի» խմբերից մեկնումեկը, կարող են զարգանալ տարբեր բարդություններ:
- Բակտերիաներ արյան հունում (բակտերեմիա). թոքերից արյան մեջ թափանցող բակտերիաները կարող են վարակը տարածել այլ օրգաններ՝ դառնալով այդ օրգանների անբավարարության պատճառ:
- Դժվարաշնչություն. եթե թոքաբորբը ծանր է կամ ունեք ուղեկցող քրոնիկ թոքային հիվանդություն, կարող է զարգանալ բավարար քանակի թթվածին ներշնչելու հետ կապված խնդիր: Հնարավոր է, որ անհրաժեշտ լինի հիվանդանոցային բուժում և շնչառական սարքեր (գազափոխանակության ապարատ)՝ մինչ ձեր թոքերը լավանում են:
- Թոքերի շուրջ հեղուկի կուտակում (պլևրալ էֆուզիա). թոքաբորբը կարող է առաջացնել պլևրալ ճեղքում հեղուկի կուտակում: Պլևրալ ճեղքը բարակ տարածություն է, որն ընկած է թոքերը և կրծքավանդակը ծածկող հյուսվածքային շերտերի միջև: Եթե այս հեղուկը վարակվում է, կարող է առաջանալ պլևրալ դրենաժային խողովակով այս տարածությունը դատարկելու կամ վիրահատական միջամտությամբ հեռացնելու անհրաժեշտություն։
- Թոքի թարախակույտ (աբսցես). թարախակույտ առաջանում է, երբ թոքի խոռոչում առաջանում և կուտակվում է թարախ: Թարախակույտը սովորաբար բուժվում է հակաբիոտիկներով։ Որոշ դեպքերում կարող է առաջարկվել թարախակույտի դրենավորում (երկար հաստ ասեղով խոռոչի պարունակության արտածծում և խողովակի՝ դրենաժի տեղադրում) կամ վիրահատական հեռացում:
Հոդվածը հրապարակվել է՝ 13-03-2021
Վերջին վերանայում՝ 01-06-2024