Ախտանիշներ - Թոքաբորբ

Թոքաբորբի գանգատներն ու ախտանիշները տարբեր են՝ սկսած մեղմից մինչև ծանր, որը կախված այնպիսի գործոններից, ինչպիսիք են վարակը հարուցող մանրէի տեսակը և ձեր տարիքն ու ընդհանուր առողջական վիճակը:

Թեթև գանգատներն ու ախտանիշները հաճախ նման են մրսածության կամ գրիպի նշաններին, բայց ավելի երկար են տևում: Հաճախ թոքաբորբը դրսևորվում է «տարած» մրսածությունից կամ գրիպից մի քանի օր հետո:

Թոքաբորբի գանգատներն ու ախտանիշները կարող են ներառել՝

• կրծքավանդակի ցավ, երբ շնչում կամ հազում եք
• շփոթվածություն կամ հոգեկան գործունեության փոփոխություններ (65 տարեկան և ավելի մեծահասակների մոտ)
• հազ, որը կարող է ուղեկցվել խորխով
• հոգնածություն
• ջերմություն (սովորաբար 38.5° C-ից բարձր), քրտնարտադրություն և դող-սարսուռ
• նորմալից ցածր մարմնի ջերմաստիճան (65 տարեկանից բարձր մեծահասակների և թույլ իմունային համակարգ ունեցող մարդկանց մոտ)
• սրտխառնոց, փսխում կամ փորլուծություն
• շնչարգելություն և հևոց:

Նորածիններն ու մանկահասակ երեխաները կարող են վարակի որևէ նշան ցույց չտալ: Այլ դեպքերում նրանք կարող են փսխել, ջերմել, հազալ, երևալ անհանգիստ կամ հոգնած և ուժասպառ, կամ դժվարությամբ շնչել և ուտել:

Ե՞րբ դիմել բժշկին

Այցելեք ձեր բժշկին, եթե ունեք դժվարաշնչություն, կրծքավանդակի ցավ, մշտական բարձր ջերմություն (39°C և ավելի բարձր) կամ համառ հազ, հատկապես, եթե ձեր հազն ուղեկցվում է թարախային խորխով:

Հատկապես կարևոր է, որ բարձր ռիսկային այս խմբերն այցելեն բժշկին՝

• 65 տարեկանից բարձր չափահասներ
• 2 տարեկանից փոքր երեխաներ, ովքեր ունեն թոքաբորբի ախտանիշներ
• մարդիկ, ովքեր ունեն մեկ այլ հիվանդություն կամ թուլացած իմունային համակարգ
• մարդիկ, ովքեր ստանում են քիմիոթերապիա կամ օգտագործում են իմունային համակարգը ճնշող դեղամիջոցներ։

Որոշ տարեցների և սրտային անբավարարությամբ կամ թոքերի քրոնիկ խնդիրներ ունեցող մարդկանց համար թոքաբորբը կարող է արագ վերածվել կյանքին սպառնացող վիճակի: