Շագանակագեղձի քաղցկեղ
15-04-2018
1 րոպե
Շագանակագեղձի քաղցկեղը չարորակ նորագոյացության տեսակ է, որը սկսվում է շագանակագեղձից:
Շագանակագեղձը միայն տղամարդկանց մոտ հանդիպող փոքր (ընկույզի չափ) կենտ գեղձ է, որը գտնվում է առնանդամի և միզապարկի միջև։ Շագանակագեղձը շրջապատում է միզածորանը՝ միզապարկից դեպի առնանդամ ձգվող խողովակը և մասնակցում է սերմնահեղուկի (սպերմա) արտադրությանը և ապահովում սպերմատոզոիդների կենսունակությունը։
Շագանակագեղձի քաղցկեղն առաջանում է, երբ գեղձի ձևափոխված բջիջները սկսում են անվերահսկելի կերպով բազմանալ։ Տղամարդու տարիքին հիվանդության հանդիպման հավանականությունը մեծանում է։
Շագանակագեղձի քաղցկեղը ամենատարածված քաղցկեղներից մեկն է: Դրանց մեծ մասն աճում է դանդաղորեն և սահմանափակվում է շագանակագեղձի սահմաններում՝ պատճառելով համեմատաբար ոչ լուրջ վնաս: Այնուամենայնիվ, շագանակագեղձի քաղցկեղի այլ տեսակներն ավելի ագրեսիվ են և կարող են արագորեն տարածվել։
Շագանակագեղձի քաղցկեղի ախտանիշները սովորաբար ի հայտ են գալիս միայն այն ժամանակ, երբ չարորակացած հյուսվածքները սկսում են ճնշել միզուկը։ Քաղցկեղի վաղ փուլերում ավելի հաճախ հանդիպում են միզելու հետ կապված ախտանիշներ և մեզի կամ սերմնահեղուկի մեջ արյան առկայություն, հազվադեպ՝ նաև ցավ գոտկատեղում:
Քաղցկեղի վաղ նշանները կարող են նմանվել շագանակագեղձի ադենոմայի նշաններին, և բժիշկը քաղցկեղը հաստատելու կամ ժխտելու համար կարող է առաջարկել որոշ հետազոտություններ (օրինակ՝ կոնքի օրգանների սոնոգրաֆիա և արյան պրոստատ-սպեցիֆիկ հակածնի (PSA) թեստ)։
Վաղ հայտնաբերված շագանակագեղձի քաղցկեղը, երբ դեռևս չի հասցրել տարածվել գեղձի սահմաններից դուրս, ունի հաջող բուժման լավագույն շանսը:
Հոդվածը վերանայվել է՝ 26-12-2022
