Շագանակագեղձի բորբոքում (պրոստատիտ)
14-02-2021
1 րոպե
Պրոստատիտը շագանակագեղձի բորբոքումն ու այտուցվածությունն է:
Շագանակագեղձը (պրոստատ) միայն տղամարդկանց մոտ հանդիպող կենտ գեղձ է, որն արտադրում է սպերմատոզոիդները կենսունակ և առողջ վիճակում պահող և սերմնահեղուկի բաղադրության մեծ մասը կազմող շագանակագեղձի հյութ: Գեղձը տեղակայված է միզապարկի տակ: Միզուկը՝ մեզը միզապարկից դեպի առնանդամ հասցնող խողովակն անցնում է շագանակագեղձի միջով: Շագանակագեղձի մկանային մասը ծառայում է որպես միզուկի ներքին սեղման (սֆինկտեր) և կանխում է մեզի հոսքը սերմնացայտման պահին (էյակուլյացիա)։
Շագանակագեղձի բորբոքումը հաճախ ընթանում է ցավոտ կամ դժվարացած միզարձակմամբ («դիզուրիա»): Այլ ախտանիշներից են շեքի, աճուկների կամ արտաքին սեռական օրգանների շրջանի ցավերը կամ երբեմն գրիպանման նշանները:
Պրոստատիտ կարող է զարգանալ բոլոր տարիքներում, սակայն ավելի հաճախ հանդիպում է մինչև 50 տարեկան տղամարդկանց շրջանում: Երբեմն շագանակագեղձի բորբոքման պատճառը մնում է չճշտված: Եթե բորբոքման պատճառը բակտերիալ վարակն է, ապա բուժումը կարող է ներառել հակաբիոտիկների նշանակում:
Կախված առաջացման պատճառից, պրոստատիտը կարող է զարգանալ աստիճանաբար կամ ի հայտ գալ հանկարծակի (սուր պրոստատիտ): Գանգատները կարող են բարելավվել արագորեն՝ ինքնուրույն կամ բուժման շնորհիվ: Որոշ տեսակների ընթացքը կարող է տևել ամիսներ և պարբերաբար սրանալ (քրոնիկ պրոստատիտ):
Հոդվածը վերանայվել է՝ 26-12-2022
