Պատճառներ - Պրոստատիտ

Պրոստատիտների մեծ մասն ունի վարակային ծագում, սակայն ոչ միշտ է, որ հնարավոր է գտնել բորբոքման հարուցիչը:

Շագանակագեղձի բորբոքման պատճառները տարբեր են՝ կախված պրոստատիտի տեսակից:

• Սուր բակտերիալ պրոստատիտը սովորաբար առաջանում է բակտերիաների տարածված շտամներով: Վարակը կարող է տարածվել միզուղիների կամ վերարտադրողական համակարգի այլ շրջաններից:
• Քրոնիկ բակտերիալ պրոստատիտը սովորաբար ունենում է նույն պատճառը, ինչ սուր բակտերիալ վարակը: Այն կարող է առաջանալ, երբ սուր վարակի բուժումը բավարար երկար չէ կամ չի կարողանում ոչնչացնել բոլոր բակտերիաները:
• Քրոնիկ պրոստատիտը կամ քրոնիկ կոնքային ցավի համախտանիշը լավ ուսումնասիրված չէ: Հետազոտությունները ցույց են տալիս, որ մի քանի գործոններ կարող են համատեղ դեր խաղալ: Դրանք ներառում են նախորդ վարակը, նյարդային համակարգի գործունեության խանգարումը, իմունային համակարգի գործունեության խանգարումը, հոգեբանական սթրեսը կամ հորմոնների անկանոն ակտիվությունը:
• Անախտանիշ (ասիմպտոմատիկ) բորբոքային պրոստատիտը, որը հայտնի պատճառ չունի, սովորաբար հայտնաբերվում է միայն այլ առողջական խնդիրների հետազոտության ժամանակ և չի բուժվում:

Այնուամենայնիվ, հաճախ պրոստատիտի զարգացման հստակ պատճառը չի հաջողվում պարզել:

Ռիսկի գործոններ

Պրոստատիտի գործոնները ներառում են՝

• երիտասարդ կամ միջին-չափահաս տարիք
• նախկինում տարած պրոստատիտ
• միզատար կամ վերարտադրողական համակարգի վարակ
• ՄԻԱՎ վարակ կամ ՁԻԱՀ
• միզային կաթետերի օգտագործում (միզապարկը դատարկող խողովակ)
• շագանակագեղձի հյուսվածքի ախտորոշիչ նմուշառում (բիոպսիա):

Քրոնիկ պրոստատիտի կամ քրոնիկ կոնքային ցավի համախտանիշի լրացուցիչ ռիսկային գործոնները կարող են ներառել՝

• հոգեբանական սթրես
• կոնքի շրջանում նյարդի վնասում վիրահատության կամ տրավմայի պատճառով: