Պատճառներ - Ռելտոցելե

Պրոլափսը հեշտոցի մեջ արտափքումն է: Ռեկտոցելեն կամ հետին հեշտոցային պրոլափսն ի հայտ է գալիս, երբ արտափքումը պատճառվում է ուղիղ աղիքի մի մասով:

Այն զարգանում է, երբ հեշտոցի և ուղիղ աղիքի միջև բարակ հյուսվածքային պատը թուլանում է, սովորաբար՝ կոնքի հատակի վրա ճնշման կամ վնասվածքի հետևանքով:

Կոնքահատակի վրա ճնշման բարձրացման պատճառները ներառում են՝

• ծննդաբերության հետ կապված պատռվածքներ
• ծննդաբերական աքցանների օգտագործում կամ վիրահատական հեշտոցային ծննդաբերություններ
• երկարաժամկետ փորկապություն կամ երկարատև ու գերլարված ջանքերով կղազատում
• երկարաժամկետ հազ կամ բրոնխիտ, որը հանգեցնում է ներորովայնային ճնշման անընդհատ բարձրացման
• ծանրությունների հաճախակի բարձրացում
• գիրություն:

Ռեկտոցելեն ավելի տարածված է հղի, ծննդաբերած կամ դաշտանադադարն անցած կանանց շրջանում:

Հղիություն և ծննդաբերություն

Հղիության և ծննդաբերության ընթացքում ձգվում են այն մկանները, կապանները և շարակցական հյուսվածքը, որոնք ապահովում են հեշտոցի ճիշտ դիրքը: Սա կարող է այդ հյուսվածքները դարձնել ավելի թույլ և ավելի քիչ օժանդակող: Որքան շատ հղիություններ ունենաք, այնքան կմեծանա հետին հեշտոցային պրոլապս առաջանալու հավանականությունը:

Եթե ​​դուք միայն կեսարյան հատումով եք ծննդաբերել, ավելի քիչ հավանական է, որ զարգանա հետին հեշտոցային պրոլապս: Սակայն, սա չի նշանակում, որ ձեզ մոտ նման վիճակ չի կարող առաջանալ:

Ռիսկի գործոններ

Հետին հեշտոցային պրոլապս կարող է զարգանալ ցանկացած կնոջ մոտ: Այնուամենայնիվ, հետևյալ գործոնները կարող են մեծացնել այս խնդրի առաջացման ռիսկը:

• Գենետիկա (ժառանգականություն). որոշ կանայք ծնվում են փոքր կոնքի շրջանի ավելի թույլ շարակցական հյուսվածքներով: Բնականաբար, սա նրանց դարձնում է հետին հեշտոցային պրոլապսի նկատմամբ ավելի խոցելի:
• Ծննդաբերություն. հեշտոցային ճանապարհով մեկից ավելի երեխա ծննդաբերելը մեծացնում է հետին հեշտոցային պրոլապսի առաջացման ռիսկը: Ծննդաբերության ժամանակ հեշտոցային բացվածքի և հետանցքի (անուսի) միջև ընկած հյուսվածքի պատռվածքները (պերինալ պատռվածքներ) կամ հեշտոցի բացվածքն ավելի լայն դարձնող կտրվածքները (էպիզիոտոմիաներ) նույնպես կարող են մեծացնել ռիսկը: Վիրահատական հեշտոցային ծննդաբերությունները և հատկապես ծննդաբերական աքցանների օգտագործումը մեծացնում են այս վիճակի զարգացման ռիսկը:
• Ծերացում. ծերանալը հանգեցնում է մկանային զանգվածի, առաձգականության և նյարդային գործառույթների կորստի, որի հետևանքով մկանները ձգվում կամ թուլանում են:
• Գիրություն. մարմնի ավելորդ քաշը ճնշում է կոնքի հատակի հյուսվածքները: