Գրադարան
Ռևմատիզմ. ախտանիշներ
1 րոպե
Ռևմատիզմի ախտանիշները կապված են սրտի, հոդերի, մաշկի կամ կենտրոնական նյարդային համակարգի բորբոքման հետ:
Կարող են լինել շատ քիչ կամ մի քանի ախտանիշներ: Դրանք կարող են փոփոխվել հիվանդության ընթացքում։ Ռևմատիզմը սովորաբար սկսվում է կոկորդի վարակից մոտ 2-4 շաբաթ անց:
Ռևմատիզմի նշաններն ու ախտանիշները կարող են ներառել՝
- ջերմություն
- ցավոտ և զգայուն հոդեր՝ առավել հաճախ ծնկների, կոճերի, արմունկների և դաստակների շրջանում
- թափառող հոդացավ, երբ մի հոդի ցավը տեղափոխվում է մեկ այլ հոդի վրա
- կարմրած, տաք կամ այտուցված հոդեր
- սրտի շրջանի ցավեր, սովորաբար՝ ձգող կամ ծակող բնույթի
- հոգնածություն
- անհարթ եզրերով տափակ կամ քիչ բարձրացած ու անցավ մաշկացան, ավելի հաճախ՝ իրանին կամ վերջույթներին
- ստետոսկոպով լսելիս՝ սրտի աղմուկ
- մարմնի ցնցումանման անկառավարելի շարժումներ՝ Սիդենհամի խորեա, առավել հաճախ ձեռքերում, ոտքերում և դեմքում
- անսովոր պահվածքի պոռթկումներ, ինչպիսիք են լացը կամ անտեղի ծիծաղը, որոնք ուղեկցում են Սիդենհեմի խորեային
- մաշկի տակ փոքր և անցավ հանգույցներ:
Ե՞րբ դիմել բժշկին
Պայմանավորվեք ձեր երեխայի բժշկի մոտ արտահերթ այց, եթե ի հայտ են եկել ստրեպտոկոկային ֆարինգիտի գանգատներ կամ ախտանիշներ, այդ թվում՝
- անսպասելիորեն առաջացող կոկորդի ցավ
- ցավ կուլ տալու ժամանակ
- ջերմություն
- գլխացավ
- ստամոքսի շրջանի ցավ, սրտխառնոց և փսխում:
Ստրեպտոկոկային ֆարինգիտի ճիշտ բուժումը կարող է կանխել ռևմատիզմը:
Հոդվածը տեղադրվել է՝ 07-07-2021 վերանայվել է՝ 14-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
