Գրադարան

Սալմոնելոզ․ կանխարգելում

Սալմոնելոզ․ կանխարգելում

Time Read 2 րոպե

Կան մի շարք պարզ միջոցներ, որոնք թույլ են տալիս բացառել կամ նվազագույնի հասցնել սալմոնելա բակտերիայի տարածումը կամ փոխանցումն այլ մարդկանց:

Սալմոնելային վարակի կանխարգելման միջոցներն առանձնահատուկ կարևոր են, երբ սնունդ է պատրաստվում կամ խնամք է կազմակերպվում նորածինների, մեծ տարիքով չափահասների և թուլացած իմունային համակարգով մարդկանց համար: Համոզվեք, որ կերակուրները ենթարկվում են լիարժեք ջերմային մշակման, իսկ չօգտագործված սնունդը պահպանվում է սառնարանում կամ սառցարանում:

Լվացեք ձեր ձեռքերը

Պատշաճ կերպով ձեռքերը լվալը կարող է օգնել կանխարգելելու սալմոնելա բակտերիայի փոխանցումը բերան կամ պատրաստվող սննդամթերք: Լվացեք ձեռքերը՝

  • զուգարանից օգտվելուց հետո
  • մանկան, մեծ տարիքով մարդկանց կամ հիվանդների տակաշորերը կամ տակդիրները փոխելուց հետո
  • հում մսին կամ թռչնամսին դիպչելուց հետո
  • ընտանի կենդանիների արտաթորանքները մաքրելուց հետո
  • երկկենցաղներին կամ թռչուններին դիպչելուց հետո:

Առանձնացրեք տարբեր մթերքները

Խաչաձև վարակումը կանխարգելելու համար՝

  • սառնարանում միսը, թռչնամիսը և ծովամթերը պահեք այլ սննդամթերքներից առանձին
  • հնարավորության դեպքում ունեցեք երկու առանձին խոհարարական տախտակ՝ մեկը հում մսի և մյուսը մրգերի ու բանջարեղենների համար
  • պատրաստի մթերքը երբեք մի դրեք նախկինում հում մսի համար օգտագործված և չլվացած ափսեի մեջ:

Խուսափեք հում հավկիթ ուտելուց

Թխվածքաբլիթի խմորը, տանը պատրաստած պաղպաղակը և գոգլին՝ բոլորն են պարունակում են հում ձու: Եթե ցանկանում եք օգտագործել հում հավկիթներ, համոզվեք, որ դրանք պաստերիզացված են:

Այլ խորհուրդներ

  • Ուշադրություն դարձրեք սննդամթերքի պիտանելիության ժամկետին:
  • Մի՛ գնեք պատրաստի սննդամթերք կասկածելի վայրերից, հատկապես տարվա շոգ եղանակին:
  • Սալմոնելային վարակը տարածված է Ասիայում, Խաղաղօվկիանոսային տարածաշրջանում, Կենտրոնական և Հարավային Ամերիկայում, ուստի այս տարածաշրջաններ ուղևորվելիս խուսափեք հավանական վարակված սննդատեսակներից՝ աղցաններ և թարմ մրգային ուտեստներ, հում կամ սառեցված ծովամթերք, չմշակված մսեղեն և այլն: Նման տարածաշրջաններում օգտագործեք շշալցված մաքուր ջուր ոչ միայն խմելու, այլև ատամները լվանալու համար: Խուսափեք սառույցով ըմպելիքներից, լվացած կամ կտրտված մրգերից:

Հոդվածը տեղադրվել է՝ 19-06-2021 վերանայվել է՝ 13-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով