Բարդություններ - Երկրորդային հիպերտենզիա

Երկրորդային հիպերտենզիան կարող է վատթարացնել բարձր արյան ճնշում պատճառող հիվանդության կամ առողջական վիճակի ընթացքը:

Առանց բուժման, երկրորդային հիպերտենզիան կարող է հանգեցնել այլ առողջական խնդիրների:

• Զարկերակների վնասում. սա կարող է ժամանակի ընթացքում առաջացնել զարկերակների պատի կարծրացում և պնդացում (աթերոսկլերոզ), որը կարող է հանգեցնել սրտամկանի ինֆարկտի, ինսուլտի կամ այլ բարդությունների:
• Անևրիզմա. արյան ճնշման բարձրացումը կարող է հանգեցնել արյունատար անոթների թուլացման և արտափքման՝ առաջացնելով անևրիզմա: Եթե ​​անևրիզման պատռվում է, կարող է կյանքին վտանգ ներկայացնել:
• Սրտային անբավարարություն. արյունն անոթներում ավելի բարձր ճնշման դեմ մղելու համար սրտի մկանները հաստանում են (գերաճ կամ հիպերտրոֆիա): Ի վերջո, հաստացած մկանը կարող է ավելի դժվարությամբ մղել այնքան արյուն, որը բավարարում է օրգանիզմի կարիքները, որը կարող է հանգեցնել սրտային անբավարարության:
• Երիկամների արյունատար անոթների թուլացում և նեղացում. սա կարող է խանգարել երիկամների ճիշտ գործունեությունը:
• Աչքերի արյունատար անոթների հաստացում, նեղացում կամ պատռում. սա կարող է հանգեցնել տեսողության կորստի:
• Մետաբոլիկ համախտանիշ. այս համախտանիշը օրգանիզմի նյութափոխանակության խանգարումների մի խումբ է, որը ներառում է մեծացած իրանի (գոտկային) շրջագիծը, բարձր տրիգլիցերիդները, բարձր խտության լիպոպրոտեիդների (ՑԽԼ) խոլեստերինի («լավ» խոլեստերին) ցածր մակարդակը, բարձր արյան ճնշումը և ինսուլինի բարձր մակարդակը: Եթե ​​դուք ունեք բարձր արյան ճնշում, ավելի հավանական է, որ ունեք մետաբոլիկ համախտանիշի այլ բաղադրիչներ: Որքան շատ բաղադրիչներ ունեք, այնքան մեծ է դիաբետի, սրտային հիվանդության կամ ինսուլտի զարգացման ռիսկը:
• Հիշողության կամ ընկալման հետ կապված խնդիրներ. չվերահսկվող բարձր արյան ճնշումը կարող է նաև ազդել մտածելու, հիշելու և սովորելու ունակության վրա: Հիշողության կամ հասկացությունների ընկալման հետ կապված խնդիրները տարածված են բարձր արյան ճնշում ունեցող մարդկանց մոտ: