Խռմփոց. ինքնօգնություն

2 րոպե

Խռմփոցը մեղմացնելու կամ կանխարգելելու համար փորձեք ներկայացված միջոցները:

• Եթե ունեք ավելորդ քաշ, ազատվեք դրանից. գեր մարդիկ ըմպանում ունեն հավելյալ հյուսվածքներ, որոնք նպաստում են խռմփոցին: Քաշի կարգավորումը կարող է օգնել խռմփոցի մեղմացմանը:
• Քնեք կողքի վրա. մեջքին պառկած վիճակում լեզուն հետ է գնում դեպի ըմպան՝ նեղացնելով շնչուղին և մասամբ խցանելով օդի հոսքը: Փորձեք քնել կողքի վրա: Եթե, այնուամենայնիվ, քնած ժամանակ շուռ եք գալիս մեջքի վրա, փորձեք ձեր ներքնազգեստի կամ գիշերանոցի մեջքի մասում կարել թենիսի գնդակ:
• Բարձրացրեք մահճակալի գլխային ծայրը. փորձեք մոտ 10 սմ-ով բարձրացնել մահճակալի գլուխը:
• Քթային ստրիպներ կամ արտաքին քթային լայնացուցիչ (դիլատատոր). քթի մեջքին փակցված կպչուն սպեղանին բազմաթիվ մարդկանց կարող է օգնել` լայնացնելով քթային անցուղին և բարելավելով շնչառությունը: Նույն նպատակի համար կան քթային լայնացուցիչներ: Այնուամենայնիվ, քթային ստրիպները և արտաքին քթային լայնացուցիչները քնի օբստրուկտիվ ապնոէ ունեցող մարդկանց համար արդյունավետ միջոցներ չեն:
• Բուժեք քթի լցվածությունը կամ փակվածությունը. ալերգիաները կամ քթի միջնապատի ծռումները կարող են սահմանափակել քթով օդի հոսքը, որի պատճառով ստիպված եք շնչել բերանով: Նման վիճակը մեծացնում է խռմփոցի հավանականությունը: Հարցրեք բժշկին ստերոիդային սփրեյների մասին, եթե ունեք քրոնիկ քթի փակվածություն: Շնչուղիների կառուցվածքային դեֆեկտների ուղղումը կարող է պահանջել վիրահատական բուժում:
• Սահմանափակեք կամ դադարեցրեք ալկոհոլի և քնաբերների օգտագործումը. քնելուց առնվազն երկու ժամ առաջ խուսափեք ալկոհոլային խմիչքներից և տեղեկացրեք ձեզ քնաբեր նշանակող բժշկին, որ ունեք խռմփոց: Քնաբերները և ալկոհոլն ընկճում են կենտրոնական նյարդային համակարգը՝ առաջացնելով մկանների, այդ թվում՝ ըմպանի փափուկ հյուսվածքների հավելյալ թուլացում:
• Դադարեցրեք ծխելը. բազմաթիվ առողջական օգուտներից բացի ծխախոտից ձերբազատվելը կարող է թուլացնել խռմփոցը (ծխախոտի ծուխը չորացնում և գրգռում է շնչուղիների լորձաթաղանթը):
• Կարգավորեք քունը. չափահասները պետք է ձգտեն հասնելու նվազագույնը 7-ժամյա գիշերային քնին: Նախադպրոցական երեխաները պետք է քնեն օրական 10-13 ժամ, դպրոցական տարիքի երեխաները՝ մինչև 12 ժամ, իսկ դեռահասները՝ 8-10 ժամ:

Այլընտրանքային բժշկություն

Խռմփոցը տարածված խնդիր է, ուստի կան բազմաթիվ արտադրանքներ, օրինակ՝ քթային սփրեյներ կամ հոմեոպաթիկ թերապիաներ: Այնուամենայնիվ, դրանց մեծ մասի արդյունավետությունը կլինիկական հետազոտություններով չի հաստատվել: