Այս էջում կներկայացվի ողնուղեղային (սպինալ) անզգայացման վերաբերյալ օգտակար տեղեկատվություն:
Եթե ունեք հարցեր, քննարկեք դրանք ձեր բժշկի կամ համապատասխան մասնագետների հետ (անեսթեզիոլոգ, վիրաբույժ և այլն):
Ի՞նչ է ողնուղեղային անզգայացումը
Ողնուղեղային կամ սպինալ անզգայացումը տեղային անզգայացնող կամ այլ ցավազրկող դեղամիջոցի ներարկումն է ողնուղեղը շրջապատող սուբարախնոիդալ տարածության մեջ:
Ողնուղեղային անզգայացումը կարող է օգտագործվել ինքնուրույն, երբ մնում եք արթուն վիճակում կամ զուգակցվել սեդատիվ (քնաբեր) դեղերի կամ ընդհանուր անզգայացման հետ:
Ողնուղեղային անզգայացում իրականացվում է ինչպես վիրահատությունը կամ այլ միջամտությունը ցավազրկելու, այնպես էլ հետվիրահատական ցավերն արդյունավետ մեղմացնելու համար:
Ինչպե՞ս է ազդում ողնուղեղային անզգայացումը
Սուբարախնոիդալ տարածությունը ողնուղեղային հեղուկով լցված պարկ է, որը շրջապատում է ողնուղեղը և ողնուղեղից դուրս եկող նյարդարմատները: Տեղային անեսթետիկ կամ ցավազրկող դեղամիջոցը ազդում են ողնուղեղի և նյարդերի վրա՝ արգելափակելով նյարդային ազդանշանների, այդ թվում՝ ցավային գրգիռների հաղորդումը:
Ինչպե՞ս է իրականացվում միջամտությունը
Ասեղը ներմուծելու համար անեսթեզիոլոգը կխնդրի, որ նստեք կամ կողքի վրա պառկեք վիրահատական սեղանին:
Այնուհետև անսեթեզիոլոգը ներմուծում է ասեղը միջողնային տարածության մեջ, և, համոզվելով, որ ասեղի դիրքը և ուղղություն ճիշտ են, ասեղի լուսանցքով ներմուծում է ավելի բարակ ու երկար սպինալ ասեղ, որով էլ ներարկում է տեղային անզգայացնող կամ ցավազրկող լուծույթը:
Ողնուղեղային անզգայացումը ցավոտ միջամտություն չէ, թեև կարող է ուղեկցվել անհարմարավետության զգացողությամբ և ծակոցով:
Օգտագործված դեղամիջոցի և ասեղի մակարդակից կախված անզգայացումը կարող է տևել 1-3 ժամ:
Ի՞նչ բարդություններ կարող են զարգանալ
Ողնուղեղային անզգայացումը կարող է դառնալ մի շարք լուրջ և կայուն բարդությունների պատճառ, այդ թվում՝
- անզգայացման խափանում
- ցածր արյան ճնշում (հիպոտենզիա)
- գլխացավեր
- քոր
- դժվարացած միզարձակում
- գոտկային ցավեր
- լսողության խանգարում կամ կորուստ
- սրտանոթային կոլապս՝ արյունատար անոթների խիստ լայնացմամբ պայմանավորված արյան ճնշման կտրուկ անկում, որն ուղկեցվում է սրտի գործունեության կտրուկ ընկճմամբ
- չակնկալված բարձր արգելափակում, երբ տեղային անեսթետիկը տարածվում է նախատեսված շրջանից ավելի բարձր
- ողնուղեղի, ողնաշարի և ներարկման շրջանի վարակ
- նյարդի վնասվածք
- ողնուղեղի կամ ողնաշարի հետ կապված տարբեր այլ ծանր խնդիրներ, օրինակ՝ ողնուղեղային թարախակույտ և արյան մակարդուկներ
- կաթված կամ մահ:
Ողնուղեղային անզգայացումից հետո ևս կարող են զարգանալ տարբեր բարդություններ, այդ թվում՝
- թարախակալում, կարմրություն, լարվածություն կամ ցավ
- բարձր ջերմություն
- վատ ինքնազգացողություն
- լուսավոր սենյակում կամ արևի ճառագայթներից անհարմարավետության զգացում (լուսազգայունություն)
- պարանոցի լարվածություն (ռիգիտություն)
- ոտքերը շարժելու դժվարություններ կամ զգացողության խանգարումներ
- դժվարամիզություն
- անկղապահություն:
Ծանր կամ կյանքին սպառնացող բարդությունները սովորաբար հանդիպում են միայն եզակի դեպքերում:
Ինչքա՞ն շուտ ես կվերականգնվեմ
Ողնուղեղային անզգայացման ազդեցությունները կարող են աստիճանաբար անհետանալ մի քանի ժամվա ընթացքում:
Ամփոփում
Ողնուղեղային անզգայացումը կարող է օգտագործվել որպես վիրահատության կամ միջամտության, ինչպես նաև հետվիրահատական արդյունավետ անզգայացնող ու ցավազրկող միջոց:
Հոդվածը հրապարակվել է՝ 08-06-2020
Վերջին վերանայում՝ 30-04-2024