Գրադարան

Կակազություն․ բուժում

Կակազություն․ բուժում

Time Read 2 րոպե

Խոսքի-լեզվի ախտաբանի կողմից համապարփակ գնահատումից հետո կարելի է որոշում կայացնել բուժման լավագույն մոտեցման մասին։

Երեխաների և չափահասների կակազության բուժման համար կան մի քանի տարբեր մոտեցումներ: Անհատական խնդիրների և կարիքների տարբեր լինելու պատճառով այն մեթոդը կամ մեթոդների համակցությունը, որն օգտակար է մեկ անձի համար, կարող է այդքան արդյունավետ չլինել մյուսի համար:

Բուժումը կարող է լիովին չվերացնել կակազությունը, սակայն կարող է սովորեցնել հմտություններ, որոնք օգնում են, որ՝

  • բարելավվի խոսքի սահունությունը
  • զարգանան արդյունավետ հաղորդակցման հմտություններ
  • դպրոցում, աշխատավայրում և սոցիալական գործունեության մեջ խթանվի անձի լիարժեք մասնակցությունը:

Ստորև ներկայացվում են բուժական մոտեցումների մի քանի օրինակներ (թվարկման հաջորդականությունն արդյունավետության հետ կապված չէ):

  • Խոսքի թերապիա (լոգոպեդիա). խոսքի թերապիան կարող է սովորեցնել ձեզ դանդաղեցնել ձեր խոսքը և սովորել նկատել, թե երբ եք կակազում: Խոսքի թերապիա սկսելիս կարող եք շատ դանդաղ և գիտակցաբար խոսել, սակայն ժամանակի ընթացքում կարող եք հասնել ձեր խոսքի ավելի բնական՝ ենթագիտակցական ձևին:
  • Էլեկտրոնային սարքեր. կան մի քանի էլեկտրոնային սարքեր, որոնք կարող են օգնել խոսքի սահունության բարելավմանը: Հետաձգված լսողական արձագանքը պահանջում է դանդաղեցնել ձեր խոսքը, հակառակ դեպքում սարքը կարձագանքի աղավաղված խոսքով: Մեկ այլ մեթոդ ընդօրինակում է ձեր խոսքն այնպես, որ թվում է, թե դուք խոսում եք մեկ ուրիշի հետ: Սարքի ընտրության վերաբերյալ խորհուրդ հարցրեք խոսքի ախտաբանից:
  • Կոգնիտիվ-վարքաբանական թերապիա. հոգեթերապիայի (փսիխոթերապիայի) այս տեսակը կարող է օգնել ձեզ սովորել, թե ինչպես բացահայտել և փոխել այն մտածելակերպը, որը կարող է վատթարացնել ձեր կակազությունը: Այն նաև կարող է օգնել ձեզ լուծել կակազության հետ կապված սթրեսը, անհանգստությունը կամ ինքնագնահատականի հետ կապված խնդիրները:
  • Ծնող-երեխա փոխազդեցություն. ծնողների ներգրավվածությունը տանը որոշակի մեթոդների կիրառման մեջ կակազության դեմ պայքարում երեխային օգնելու հիմնական մասն է: Հետևեք խոսքի ախտաբանի ցուցումներին՝ ձեր երեխայի համար լավագույն մոտեցումն ընտրելու համար:

Դեղամիջոցներ

Որոշ դեղամիջոցներ փորձարկվել են կակազության դեմ, սակայն դեռևս ապացուցված չէ, որ որևէ դեղամիջոց կարող է օգնել այս խնդրի լուծմանը:

Հոդվածը տեղադրվել է՝ 28-01-2024 վերանայվել է՝ 28-01-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով