Տոնզիլէկտոմիա (նշագեղձերի հեռացում)

Տոնզիլէկտոմիա (նշագեղձերի հեռացում)

Նշագեղձերը երկու փոքր գեղձեր են, որոնք տեղակայված են ըմպանի երկու կողմերում:

Դրանք օգնում են (հատկապես՝ մանկական հասակում) վարակների դեմ պայքարին: Այնուամենայնիվ, որոշ դեպքերում կարիք է զգացվում վիրահատական մեթոդով հեռացնել այս հյուսվածքային բարձիկները, որը կոչվում է տոնզիլէկտոմիա:

Ինչո՞ւ է տոնզիլէկտոմիան կատարվում

Տոնզիլէկտոմիան ցուցված է, եթե դուք կամ ձեր երեխան ունեք նշագեղձերի կամ դրանց հարակից հյուսվածքների կայուն կամ կրկնվող խնդիրներ, օրինակ՝ հաճախակի բորբոքում կամ վարակ (տոնզիլիտ): Երբեմն նշագեղձերը հեռացվում են, քանի որ մեծանալով առաջացնում են շնչառության հետ կապված խնդիրներ կամ քնի խանգարումներ:

Ինչպե՞ս նախապատրաստվել տոնզիլէկտոմիային

Վիրահատական միջամտությանը պետք է ներկայանալ քաղցած վիճակում, քանի դեռ բժիշկն այլ ցուցումներ չի հրահանգել: Նույն կերպ, բժիշկը կարող է առաջարկել, որ դադարեցնեք որոշ դեղերի ընդունումը, օրինակ՝ Ասպիրին, հակաբորբոքային դեղեր (օրինակ՝ Նուրոֆեն) և այլն:

Ինչպե՞ս է իրականացվում տոնզիլէկտոմիան

Որպես կանոն, նշագեղձերի հեռացումն իրականացվում է ընդհանուր անզգայացման ներքո: Դուք կամ ձեր երեխան քնած եք լինելու ողջ վիրահատության ընթացքում և որևէ ցավ չեք զգալու: Վիրաբույժը նշագեղձերը հեռացնում է ձեր բաց բերանով, ուստի մաշկի վրա որևէ կտրվածքի անհրաժեշտություն չի առաջանում:

Նշագեղձերի հեռացումը և առողջացման տևողությունը

Արթնանալուց հետո դուք կամ ձեր երեխան հավանաբար կզգաք ըմպանում անհարմարավետության զգացողություն (դիսկոմֆորտ) կամ ցավ: Կարող եք նաև նշել ընդհանուր թուլություն և վատ ինքնազգացողություն: Ըստ անհրաժեշտության բժիշկը կնշանակի ցավազրկող և այլ դեղեր:

Տոնզիլէկտոմիայից հետո սովորաբար գիշերելու եք կլինիկայում: Երեխաներին կարող է առաջարկվել մեկ-երկու շաբաթվա ընթացքում բացակայել դասերից:

Հետվիրահատական շրջանում բժիշկը խորհուրդ կտա զերծ մնալ որոշ սննդամթերքներից, օրինակ՝ նարինջ և կիտրոն:

Ինչպիսի՞ բարդություններ կարող են լինել

Տոնզիլէկտոմիան անվտանգ միջամտություն է: Երբեմն հեռացված նշագեղձերի շրջանում կարող են ի հայտ գալ արյունահոսություն կամ վարակ: Եթե ունեք թարմ արյունահոսություն, բարձր ջերմություն կամ չեք կարողանում հեղուկներ կամ սնունդ ընդունել, առանց հետաձգելու զանգեք ձեր բժշկին:

Եթե արյունահոսությունն առատ է, անհապաղ զանգեք 1-03 և կանչեք շտապբուժօգնություն կամ այցելեք մոտակա անհետաձգելի բուժօգնության կենտրոն:

Լրացուցիչ տեղեկատվություն

Նշագեղձերի բորբոքման մասին

Այցելե՛ք Մեդեքսի տոնզիլիտ էջը, որ ծանոթանաք այս հիվանդության մասին:

Վիրահատական միջամտությունների մասին

Այցելե՛ք Մեդեքսի վիրահատական միջամտությունների համապատասխան էջերը, որ լրացուցիչ ընդհանուր բնույթի տեղեկություններ ստանաք վիրահատությունների վերաբերյալ, այդ թվում՝

Հոդվածը վերանայվել է՝ 04-07-2021