Անմիզապահություն. ախտանիշներ

Անմիզապահություն. ախտանիշներ

Բազմաթիվ մարդկանց մոտ կյանքի տարբեր դրվագներում ի հայտ է գալիս պատահական կամ քիչ քանակով մեզի ակամա արտահոսք:

Մյուսների մոտ փոքրից մինչև չափավոր քանակներով մեզի ակամա արտահոսքը կարող է ստանալ ավելի հաճախակի բնույթ: Այլ դեպքերում կարող է ամբողջովին կորել միզապարկի գործունեության հսկողությունը:

Անմիզապահության հիմնական տեսակները ներկայացված են ստորև:

  • Սթրեսային անմիզապահություն. մեզը կարող է արտահոսել, երբ ներորովայնային ճնշման բարձրացման հետևանքով միզապարկը ենթարկում է ավելցուկային ճնշման, օրինակ՝ հազալիս, փռշտալիս, ծիծաղելիս, ֆիզիկական վարժանք կատարելիս կամ որևէ ծանրություն բարձրացնելիս: Անմիզապահության այս տեսակը կոչվում է սթրեսային, սակայն որևէ կապ չունի սթրեսի հետ (տվյալ համատեքստում սթրեսը վերաբերվում է ֆիզիկական լարվածությունը):
  • «Ստիպողական» անմիզապահություն. անմիզապատության այս տեսակի ժամանակ միզարձակման հանկարծակի և անզուսպ ցանկությունն առաջացնում է մեզի ակամա արտահոսք: Այլ կերպ ասած, «ստիպողական» անմիզապահությունը միզարձակման սուր ցանկությունը զսպելու անկարողությունն է: Նման վիճակը երբեմն անվանում են նաև «գերակտիվ միզապարկ» կամ «անկայուն միզապարկ»: «Ստիպողական» անմիզապահությունը ստիպում է հաճախակի միզել, այդ թվում՝ գիշերները: Այն կարող է պատճառվել փոքր խնդիրներից, օրինակ՝ վարակից կամ ավելի ծանր հիվանդություններից, օրինակ՝ նյարդաբանական խանգարումներ կամ դիաբետ:
  • Գերլցվածության անմիզապահություն. անմիզապահության այս տեսակը դրսևորվում է մեզի հաճախակի կամ կայուն կաթոցներով, որի պատճառը միզապարկի ոչ լիարժեք դատարկումն է և միզելուց հետո միզապարկում մնացորդային մեզ պահպանվելը:
  • Ֆունկցիոնալ (ոչ օրգանական) անմիզապահություն. ֆիզիկական կամ հոգեկան խնդիրները կարող են թույլ չտալ, որ անձը ժամանակին օգտվի զուգարանից: Օրինակ, ծանր արթրիտով մարդիկ կարող են դժվարությամբ արձակել հագուստի կոճակները և չհասցնել միզել այնպես, ինչպես պետք է:
  • Խառը անմիզապահություն. սա այն իրավիճակն է, երբ անձի մոտ միաժամանակ առկա են անմիզապահության մի քանի տեսակներ: Ավելի հաճախ զուգակցվում են սթրեսային և «ստիպողական» անմիզապահությունները:

Ե՞րբ դիմել բժշկին

Բնական է, որ անմիզապահության վերաբերյալ բժշկին տեղեկացնելը կամ այդ թեմայով զրուցելը կապված է որոշակի անհարմարության հետ: Այնուամենայնիվ, եթե անմիզապահությունը հաճախակի բնույթ է կրում կամ բացասաբար է անդրադառնում կյանքի որակի վրա, կարևոր է ստանալ բժշկական խորհրդատվություն, քանի որ ակամա միզումը կարող է՝

  • կտրուկ սահմանափակել առօրա գործառույթները և շփումները
  • բացասաբար ազդել կյանքի որակի վրա
  • բարձրացնել մեծ տարիքով չափահաս մարդկանց մոտ ընկնելու ռիսկը, երբ փորձում են շտապել զուգարան
  • վկայել ավելի լուրջ հիվանդության առկայության մասին:

Հոդվածը վերանայվել է՝ 10-07-2021