Պատճառներ - Միզուղիների վարակ

Միզուղիների վարակները սովորաբար առաջանում են, երբ բակտերիաները միզուկով ներթափանցում են միզուղիներ և սկսում են տարածվել միզապարկում:

Միզային համակարգը կառուցված է այնպես, որ հնարավորինս հեռու մնա կամ շուտ ազատվի բակտերիաներից: Սակայն, այսպիսի բնական պաշտպանությունները երբեմն խափանվում է: Երբ դա տեղի է ունենում, բակտերիաները կարող են պահվել միզուղիներում և վերաճել լիարժեք վարակի:

Միզուղիների ամենատարածված վարակները հիմնականում հանդիպում են կանանց շրջանում և ախտահարում միզապարկը և միզուկը:

• Միզապարկի վարակ (ցիստիտ). միզուղիների վարակի այս տեսակը սովորաբար հարուցվում է աղիքային ցուպիկով (Escherichia coli կամ կրճատ E. coli): E. coli-ն բակտերիայի տեսակ է, որը սովորաբար հայտնաբերվում է է ստամոքս-աղիքային խողովակում: Սակայն, երբեմն պատճառն այլ բակտերիաներ են: Սեռական հարաբերությամբ զբաղվելը նույնպես կարող է հանգեցնել միզապարկի վարակի, սակայն վարակի համար պարտադիր չէ սեռական ակտիվ լինել: Բոլոր կանայք իրենց իգական անատոմիայի պատճառով ռիսկի տակ են: Կանանց մոտ միզուկը մոտ է հետանցքին: Իսկ միզածորանի բացվածքը մոտ է միզապարկին (միզուկը կարճ է)։ Սա հեշտացնում է հետանցքի շուրջ գտնվող բակտերիաների թափանցումը միզուկ և միզապարկ:
• Միզուկի վարակ (ուրեթրիտ). միզուղիների վարակի այս տեսակը կարող է զարգանալ, երբ ստամոքս-աղիքային բակտերիաները հետանցքից տարածվում են մինչև միզուկ: Միզուկի վարակը նաև կարող է առաջանալ սեռական ճանապարհով փոխանցվող վարակների պատճառով՝ հերպես, գոնորեա, քլամիդիա և միկոպլազմա: Սա հնարավոր է, քանի որ կանանց միզուկի բացվածքը մոտ է հեշտոցին:

Ռիսկի գործոններ

Միզուղիների վարակները տարածված են կանանց մոտ: Բազմաթիվ կանայք իրենց կյանքի ընթացքում ունենում են մեկից ավելի վարակներ:

Կանանց համար բնորոշ միզուղիների վարակների ռիսկի գործոնները ներառում են հետևյալը:

• Կանացի (իգական) անատոմիա. կանայք ունեն ավելի կարճ միզուկ, քան տղամարդիկ, որի պատճառով միզապարկ հասնելու համար բակտերիաներն ավելի կարճ տարածություն են անցնում:
• Սեռական ակտիվություն. սեռական ակտիվ լինելը հակված է հանգեցնելու միզուղիների ավելի շատ վարակների: Նոր սեռական զուգընկեր ունենալը նույնպես մեծացնում է ռիսկը:
• Հղիության վերահսկման որոշակի տեսակներ. հղիության վերահսկման (կանխարգելման) համար դիաֆրագմաների օգտագործումը կարող է մեծացնել միզուղիների վարակների ռիսկը: Սերմը ոչնչացնող նյութերի (սպերմիցիդների) օգտագործումը նույնպես կարող է մեծացնել ռիսկը:
• Դաշտանադադար (մենոպաուզա). դաշտանադադարից հետո արյան հունով շրջանառող էստրոգենի նվազումը առաջացնում է միզուղիների փոփոխություններ, որոնք կարող են մեծացնել վարակների ռիսկը:

Միզուղիների վարակների այլ ռիսկի գործոնները ներառում են հետևյալը:

• Միզուղիների խնդիրներ. միզուղիների հետ կապված խնդիրներով ծնված երեխաները կարող են ունենալ միզելու հետ կապված խնդիրներ: Մեզը կարող է պահվել միզուկում, որն էլ կարող է նպաստել միզուղիների վարակի առաջացմանը:
• Միզուղիների խցանումներ. երիկամային քարերը կամ տղամարդկանց մոտ մեծացած շագանակագեղձը կարող են մեզը պահել միզապարկի մեջ: Նման իրավիճակում միզելուց հետո միզապարկն ամբողջապես չի դատարկվում (կոչվում է մնացորդային մեզ): Արդյունքում, միզուղիների վարակի ռիսկն աճում է:
• Ընկճված իմունային համակարգ. շաքարային դիաբետը և այլ հիվանդությունները կարող են խաթարել իմունային համակարգը, որն օրգանիզմը պաշտպանում է մանրէներից: Սա կարող է մեծացնել միզուղիների վարակների ռիսկը:
• Միզային կաթետերի օգտագործում. մարդիկ, ովքեր չեն կարողանում ինքնուրույն միզել, հաճախ պետք է օգտագործեն խողովակ, որը կոչվում է միզային կաթետեր: Կաթետերի օգտագործումը մեծացնում է միզուղիների վարակների ռիսկը: Կաթետերները նաև կարող են օգտագործվել հիվանդանոցային բուժում ստացող մարդկանց համար: Դրանց անհրաժեշտությունը նաև կարող է առաջանալ այն մարդկանց համար, ովքեր ունեն այնպիսի նյարդաբանական խնդիրներ, որոնք դժվարացնում են միզարձակումը վերահսկելը կամ անդամալույծ են:
• Միզուղիների վրա վերջերս կատարված միջամտություն. միզուղիների վիրահատությունը կամ բժշկական գործիքներով հետազոտությունը (օրինակ՝ ցիստոսկոպիան) կարող են մեծացնել միզուղիների վարակի զարգացման ռիսկը: