Բուժում - Միզուղիների վարակ

Հակաբիոտիկները սովորաբար միզուղիների վարակների առաջին բուժումն են:

Ձեր առողջական վիճակը, մեզի մեջ հայտնաբերված բակտերիաների տեսակը և դրանց նկատմամբ հակաբիոտիկների զգայունության որոշումը թույլ են տալիս ընտրել, թե որ դեղամիջոցն է պետք նշանակել և որքան ժամանակ է անհրաժեշտ այն ընդունել:

Սովորական (չբարդացած) վարակ

Միզուղիների սովորական վարակների դեպքում սովորաբար նշանակվում են հետևյալ դեղամիջոցները՝

• Տրիմեթոպրիմ և Սուլֆամեթոքսազոլ (Բակտրիմ, Բակտրիմ DS)
• Ֆոսֆոմիցին (Մոնուրոլ)
• Նիտրոֆուրանտոին (Մակրոդանտին, Մակրոբիդ, Ֆուադանտին)
• Ցեֆալեքսին
• Ցեֆտրիաքսոն:

Հակաբիոտիկների խումբը, որը հայտնի է որպես ֆտորխինոլոններ, չբարդացած վարակների բուժման համար ընդհանուր առմամբ խորհուրդ չի տրվում: Դրանցից են Ցիպրոֆլոքսացինը (Ցիպրո), Լևոֆլոքսացինը և այլն: Այս դեղերի ռիսկերը հիմնականում գերազանցում են չբարդացած վարակների բուժման օգուտները:

Միզուղիների բարդացած վարակների կամ երիկամների վարակի դեպքում ձեր բժիշկը կարող է նշանակել ֆտորխինոլոնային դեղամիջոց, եթե բուժման այլ տարբերակներ չկան:

Միզուղիների վարակների ախտանիշները հաճախ անհետանում են բուժումը սկսելուց մի քանի օրվա ընթացքում: Սակայն, ձեզ կարող է անհրաժեշտ լինել հակաբիոտիկային բուժումը շարունակել մեկ շաբաթ կամ ավելի: Ընդունեք ձեզ նշանակված դեղամիջոցի ամբողջական կուրսն այնպես, ինչպես հրահանգել է ձեր բժիշկը:

Միզուղիների չբարդացած վարակների դեպքում, որն առաջանում է, երբ այլ առողջական խնդիրներ չունեք, ձեր բժիշկը կարող է խորհուրդ տալ ավելի կարճատև բուժում, օրինակ, հակաբիոտիկի ընդունում միայն 1-ից 3 օր: Այն, թե արդյոք այսպիսի կարճատև բուժումը բավարար է ձեր վարակը բուժելու համար, կախված է ձեր ախտանիշներից և հիվանդության պատմությունից:

Ձեր բժիշկը նաև կարող է նշանակել որևէ ցավազրկող դեղամիջոց, որը կարող է թեթևացնել միզելիս այրոցը կամ ցավը: Այնուամենայնիվ, ցավը սովորաբար անհետանում է հակաբիոտիկների օգտագործումը սկսելուց անմիջապես հետո:

Հաճախակի (կրկնվող) վարակներ

Եթե հաճախակի ունենում եք միզուղիների վարակներ, ձեր բժիշկը կարող է խորհուրդ տալ հետևյալը:

• Ցածր դեղաչափով հակաբիոտիկներ, որոնք կարող են նշանակվել վեց ամիս կամ ավելի երկար ժամանակահատվածի համար:
• Ախտորոշել և բուժել ինքներդ ձեզ, երբ ախտանիշները հայտնվում են: Ձեզանից նաև կպահանջվի կապի մեջ մնալ ձեր բժշկի հետ:
• Սեռական հարաբերությունից հետո ընդունել հակաբիոտիկի մեկ (եզակի) դեղաչափ, եթե միզուղիների վարակները կապված են ձեր սեռական ակտիվության հետ:
• Հեշտոցային էստրոգենային թերապիա, եթե հասել եք դաշտանադադարի փուլ:

Ծանր վարակ

Ծանր վարակները սովորաբար բուժվում են ներերակային հակաբիոտիկներով: Նման դեպքերում բուժումը կազմակերպվում է հիվանդանոցային պայմաններում: