Ախտանիշներ - Վասկուլիտ

Վասկուլիտի գանգատներն ու ախտանիշները կախված են հիմնական վնասված շրջանից կամ օրգանից։

Այնուամենայնիվ, վասկուլիտի շատ տեսակների ընդհանուր գանգատներն ու ախտանիշները ներառում են՝

• ջերմություն
• գլխացավ
• թուլություն
• քաշի կորուստ
• ընդհանուր բնույթի ցավեր և տհաճ զգացողություններ:

Այլ գանգատները և ախտանիշները կապված են ախտահարված շրջանի հետ:

• Մարսողական համակարգ. եթե վնասվել են ձեր ստամոքսը կամ աղիքները, դուք կարող եք ցավ զգալ ուտելուց հետո: Հնարավոր են խոցեր և թափածակումներ (պերֆորացիաներ), որոնք կարող են հանգեցնել կղանքի մեջ արյան հայտնվելուն:
• Ականջներ. կարող է առաջանալ գլխապտույտ, ականջներում զնգոց (տինիտուս) և լսողության կտրուկ կորուստ:
• Աչքեր. վասկուլիտը կարող է ձեր աչքերը կարմրացնել և առաջացնել քոր ու այրոց: Հսկաբջջային արտերիիտը կարող է առաջացնել երկտեսություն և մեկ կամ երկու աչքերում ժամանակավոր կամ մշտական կուրություն: Սա երբեմն հիվանդության առաջին նշանն է:
• Դաստակներ կամ ոտնաթաթեր. վասկուլիտի որոշ տեսակներ կարող են առաջացնել դաստակների կամ ոտնաթաթերի թմրածություն կամ թուլություն: Ձեռքերի ափերը և ոտնաթաթերը կարող են այտուցվել կամ պնդանալ:
• Թոքեր. դուք կարող եք շնչարգելություն և հևոց ունենալ կամ նույնիսկ արյուն հազալ, եթե վասկուլիտը ազդի ձեր թոքերի վրա:
• Մաշկ. ենթամաշկային արյունահոսությունը կարող է դրսևորվել կարմիր բծերի տեսքով: Վասկուլիտը կարող է նաև ձեր մաշկի վրա առաջացնել հանգույցներ կամ բաց վերքեր:

Ե՞րբ դիմել բժշկին

Պայմանավորվեք այց ձեր բժշկի մոտ, եթե ունեք որևէ գանգատ կամ ախտանիշ, որը ձեզ անհանգստացնում է: Վասկուլիտի որոշ տեսակներ կարող են արագ վատթարանալ, ուստի վաղ ախտորոշումը արդյունավետ բուժում ստանալու բանալին է: