Պատճառներ - Փորոքային տախիկարդիա

Փորոքային հաճախասրտությունը կամ վենտրիկուլյար տախիկարդիան առաջանում է սրտի ազդանշանային համակարգի սխալ գործառույթի պատճառով, որի հետևանքով արագանում է սրտի ստորին խոռոչների (փորոքների) կծկումները:

Սրտի արագացած ռիթմը թույլ չի տալիս, որ փորոքները լցվեն և սեղմվեն (կծկվեն)՝ բավականաչափ արյուն մղելով դեպի օրգանիզմ:

Բազմաթիվ գործոններ կարող են առաջացնել կամ նպաստել սրտի ազդանշանների հետ կապված խնդիրների զարգացմանը և հանգեցնել փորոքային տախիկարդիայի: Դրանք ներառում են՝

• նախկին սրտամկանի ինֆարկտ կամ սրտային այլ հիվանդություն, որն առաջացրել է սրտի հյուսվածքի սպի (սրտի կառուցվածքային հիվանդություն)
• սրտամկանի արյան վատ հոսք՝ սրտի իշեմիկ (պսակային զարկերակային) հիվանդության պատճառով
• սրտի բնածին հիվանդություններ, այդ թվում՝ երկարատև QT համախտանիշ
• արյան մեջ էլեկտրոլիտներ կոչվող նյութերի անհավասարակշռություն, ինչպիսիք են կալիումը, նատրիումը, կալցիումը և մագնեզիումը
• դեղերի կողմնակի ազդեցություններ
• խթանիչների օգտագործում, ինչպիսիք են կոկաինը կամ մետամֆետամինը:

Երբեմն, փորոքային տախիկարդիայի ճշգրիտ պատճառը հնարավոր չէ որոշել (իդիոպաթիկ փորոքային տախիկարդիա):

Ինչպե՞ս է սիրտը գործում

Փորոքային տախիկարդիայի պատճառն ավելի լավ հասկանալու համար կարող է օգտակար լինել իմանալ, թե ինչպես է սովորաբար աշխատում սիրտը:

Սիրտը կազմված է չորս խցիկներից (փորոքներ)՝ երկու վերին (նախասրտեր) և երկու ստորին (փորոքներ):

Սրտի ռիթմը վերահսկվում է աջ վերին խոռոչում (նախասրտում) սրտի բնական ռիթմավարի միջոցով, որը կոչվում է սինուսային հանգույց: Սինուսային հանգույցը ուղարկում է էլեկտրական ազդանշաններ, որոնք սովորաբար սկիզբ են դնում յուրաքանչյուր սրտի կծկմանը: Այս էլեկտրական ազդանիշները շարժվում են նախասրտերի միջով, ինչի հետևանքով սրտի մկանները սեղմվում են (կծկվում) և արյունը մղում դեպի փորոքներ:

Այնուհետև ազդանիշները հասնում են բջիջների խմբերին, որը կոչվում է AV (նախասիրտ-փորոքային) հանգույց, որտեղ դրանք քիչ դանդաղում են: Այս փոքր ուշացումը թույլ է տալիս, որ փորոքները լցվեն արյունով: Երբ էլեկտրական ազդանիշները հասնում են փորոքներ, խոռոչները կծկվում են և արյունը մղում դեպի թոքեր կամ օրգանիզմի մնացած շրջաններ:

Սովորական սրտում սրտի ազդանշանային այս գործընթացը սովորաբար ընթանում է սահուն, ինչի արդյունքում սիրտը հանգստի վիճակում կծկվում է րոպեում 60-ից 100 զարկ հաճախականությամբ:

Փորոքային տախիկարդիայի դեպքում սրտի ստորին խոռոչներում սխալ էլեկտրական ազդանիշները հանգեցնում են սրտազարկի հաճախականության բարձրացման մինչև 100 կամ ավելի զարկ մեկ րոպեում:

Ռիսկի գործոններ

Ցանկացած վիճակ, որը գերլարում է սիրտը կամ վնասում է սրտի հյուսվածքը, կարող է մեծացնել փորոքային տախիկարդիայի ռիսկը: Հետևյալ վիճակների և իրավիճակների դեպքում ապրելակերպի փոփոխությունները կամ համապատասխան բուժումը կարող են նվազեցնել ռիսկը՝

• սրտային հիվանդություն
• դեղերի կողմնակի ազդեցություններ
• էլեկտրոլիտային ծանր անբավարարություն
• խթանիչ թմրամիջոցների օգտագործում, ինչպիսիք են կոկաինը կամ մեթամֆետամինը:

Տախիկարդիայի կամ սրտի ռիթմի այլ խանգարումների ընտանեկան պատմությունը (անամնեզ) մեծացնում է փորոքային տախիկարդիայի զարգացման հավանականությունը: