Ախտանիշներ - Փորոքային տախիկարդիա

Երբ սիրտը չափազանց արագ է բաբախում, այն կարող է բավարար քանակությամբ արյուն չարտամղել դեպի օրգանիզմի մնացած շրջաններ:

Ուստի, օրգաններն ու հյուսվածքները կարող են բավարար քանակությամբ արյուն, և արյան հետ՝ թթվածին չստանալ: Գանգատներն ու ախտանիշները, որոնք ի հայտ են գալիս փորոքային կամ վենտրիկուլյար տախիկարդիայի դրվագում, պայմանավորված են թթվածնի պակասով և կարող են ներառել՝

• կրծքավանդակի կամ ետկրծոսկրային ցավ (կրծքահեղձուկ)
• գլխապտույտ
• սրտի բաբախումների զգացողություն (սրտխփոց)
• ուշագնացության զգացում
• շնչարգելություն և հևոց:

Փորոքային տախիկարդիան կարող է ինքնուրույն անհետանալ 30 վայրկյանի ընթացքում (ոչ կայուն V-tach) կամ տևել ավելի քան 30 վայրկյան (կայուն V-tach կամ VT): Կարճ դրվագները կարող են որևէ ախտանիշ չառաջացնել: Սակայն կայուն VT-ն կարող է հանգեցնել լուրջ խնդիրների, այդ թվում՝

• ուշագնացություն
• գիտակցության կորուստ
• սրտի կանգ (հանկարծամահություն):

Ե՞րբ դիմել բժշկին

Բազմաթիվ տարբեր բաներ կարող են առաջացնել փորոքային տախիկարդիա, ուստի, կարևոր է ստանալ արագ, ճշգրիտ ախտորոշում և համապատասխան բուժում: Այցելեք ձեր բժշկին, եթե դուք կամ ձեր երեխան սրտազարկի հետ կապված որևէ խնդիր ունեք: Որոշ դեպքերում անհրաժեշտ է շտապ կամ անհետաձգելի բուժօգնություն:

Զանգեք 1-03 և կանչեք շտապ օգնություն, եթե որևէ մեկն ունի այս ախտանիշները՝

• կրծքավանդակի (ետկրծոսկրային) ցավ, որը տևում է ավելի քան մի քանի րոպե
• օդի պակասի զգացում կամ դժվարաշնչություն
• ուշագնացություն: