Ցորենի նկատմամբ ալերգիա ունեցող երեխայի կամ չափահասի մոտ, ամենայն հավանականությամբ, գանգատներ և ախտանիշներ կզարգանան ցորեն պարունակող որևէ բան ուտելուց հետո մի քանի րոպեից մինչև մի քանի ժամվա ընթացում:
Ցորենից ալերգիայի գանգատներն ու ախտանիշները ներառում են՝
- բերանի կամ կոկորդի այտուց, քոր կամ գրգռվածություն
- եղնջացան, քոր առաջացնող ցան կամ մաշկի այտուցվածություն
- քթի փակվածություն
- գլխացավ
- շնչարգելություն
- մկանային ջղաձգումներ (ցնցումներ), սրտխառնոց կամ փսխում
- փորլուծություն
- անաֆիլաքսիա:
Անաֆիլաքսիա
Որոշ մարդկանց մոտ ցորենի նկատմամբ ալերգիան կարող է վերաճել կյանքին սպառնացող ռեակցիայի, որը կոչվում է անաֆիլաքսիա: Ի լրումն ցորենից ալերգիայի այլ գանգատների և ախտանիշների, անաֆիլաքսիան կարող է առաջացնել՝
- կոկորդի այտուցվածություն կամ սեղմվածության զգացում
- կրծքավանդակային ցավ կամ սեղմվածության զգացում
- ծանր դժվարաշնչություն (հևոց)
- կուլ տալու դժվարություն
- գունատ կամ կապտավուն մաշկ
- գլխապտույտ կամ ուշագնացություն:
Ե՞րբ դիմել բժշկին
Եթե ձեր ներկայությամբ ինչ-որ մեկի մոտ զարգանում են անաֆիլաքսիայի նշաններ, առանց ուշացնելու զանգեք 1-03 և կանչեք շտապ օգնություն: Անաֆիլաքսիան անհետաձգելի բժշկական վիճակ է, որը պահանջում է անհապաղ օգնություն:
Եթե կասկածում եք, որ դուք կամ ձեր երեխան ալերգիկ եք ցորենի կամ այլ սննդամթերքի նկատմամբ, դիմեք ձեր բժշկին:
Հոդվածը հրապարակվել է՝ 01-09-2023
Վերջին վերանայում՝ 22-04-2024