Կիստան ձեր մարմնի ներսում՝ հյուսվածքներում կամ օրգաններում առաջացող խորշ է, խոռոչ կամ պարկ, որը լցված է հեղուկով, կիսահեղուկ կամ կիսապինդ նյութով կամ օդով:
Այլ կերպ ասած, կիստան պատեր և պարունակություն ունեցող ախտաբանական խոռոչ է կամ պարկ: Կիստայի չափը, պարունակությունն ու պատի կառուցվածքը տարբեր են՝ կախված առաջացման պատճառից և ժամանակից, տեղակայումից և այլ գործոններից: Կիստան կարող է լինել ի ծնե կամ առաջանալ կյանքի ընթացքում, օրինակ՝ որևէ հյուսվածքի կամ օրգանի գործունեության խանգարման պատաճառով:
Կիստաները տարածված են և կարող են ձևավորվել մարմնի ցանկացած շրջանում: Դրանք կարող են լինել աչքի համար անտեսանելի չափերի կամ աճել՝ հասնելով թենիսի գնդակի և ավելի մեծ չափերի (հսկա կիստաներ): Այն կարող է ունենալ հստակ պատճառ կամ, ավելի հաճախ, որևէ պատճառ չհայտնաբերվի:
Կիստաները տարբերվում են թարախակույտերից (աբսցես) կամ ֆուրունկուլներից (չիբան), որոնք լցված են թարախով: Բազմաթիվ կիստաներ քաղցկեղային չեն, թեև կիստա կարող է առաջանալ նաև որոշ քաղցկեղների ժամանակ:
Կիստաների տեսակները
Կան կիստաների հարյուրավոր տեսակներ: Դրանց տարբեր տեսակները ձևավորվում են մարմնի տարբեր շրջաններում: Կիստաների ամենահաճախ հանդիպող տեսակներից են՝
- ակնեի կիստաներ
- բարթոլինյան կիստաներ (հեշտոցի վրա)
- կրծքագեղձի կիստաներ
- խալազիոնային կիստաներ (կոպերի վրա)
- ձվարանային կիստաներ
- ենթաստամոքսային գեղձի (պանկրեատիկ) կիստաներ
- պոչուկային (պիլոնիդալ) կիստաներ (պոչուկային ոսկրի մոտ):
Հոդվածը հրապարակվել է՝ 07-05-2020
Վերջին վերանայում՝ 29-04-2024