Պատճառներ - Ակնե

Ակնեն մաշկի ճարպամազային ապարատի ախտահարումն է, որի պատճառը մինչև վերջ հայտնի չէ։

Ակնեի առաջացման 4 հիմնական գործոններն են՝

• մաշկային ճարպի ավելցուկային արտադրություն
• մազապարկի խցանում ճարպով և մաշկի մահացած բջիջներով
• բակտերիա
• բորբոքում:

Տիպիկ դեպքերում ակնեն հայտնվում է դեմքին, ճակատին, կրծքին, թիկունքին և ուսերին, քանի որ այս շրջանների մաշկը պարունակում է ամենաշատ ճարպագեղձերը: Մազապարկերը միացած են ճարպագեղձերին:

Ակնեի ամենավաղ ախտաբանական փոփոխությունը խցանի ձևավորումն է (միկրոկոմեդոն), որը փակում է մազապարկի անցքը: Արգելափակված ճարպի մեծ քանակությունը միմյանց է սոսնձում մաշկի մահացած բջիջները: Մազապարկն ուռչում է և ձևավորվում է սպիտակ կամ փակ կորյակ (կոմեդոն), որը կարող է բացվել դեպի մաշկի մակերևույթ և օդի ազդեցությամբ մգանալ՝ առաջացնելով սև կամ բաց կորյակ: Հանգույցիկը՝ մաշկից բարձրացած սպիտակ կենտրոնով կարմիր գոյացությունը զարգանում է, երբ մազապարկը բորբոքվում կամ վարակվում է բակտերիաներով: Խցանումը և մազապարկի խոր բորբոքումն առաջացնում են դեպի մաշկի մակերևույթ ուղղված բշտաձև գոյացություն (կիստա), որը վարակի միանալու դեպքում վերածվում է թարախաբշտի: Ակնեի ձևավորման մեջ քրտնագեղձերը չեն մասնակցում:

Որոշ գործոններ կարող են խթանել կամ վատթարացնել ակնեն:

• Հորմոնային փոփոխություններ. արական հորմոնները՝ անդրոգենները, որոնց մակարդակը բարձրանում է տղաների և աղջիկների սեռահասունացման ընթացքում, առաջացնում են ճարպագեղձերի մեծացում և ճարպի արտադրության խթանում, ինչպես նաև ճարպի մածուցիկացում (պնդացում): Միջին տարիքին բնորոշ հորմոնային տեղաշարժերը, հատկապես կանանց շրջանում նույնպես կարող են բերել ակնեի «բռնկման»:
• Դեղեր. օրինակներից են՝ կորտիկոստերոիդներ, տեստոստերոն և լիթիում պարունակող դեղամիջոցներ:
• Սննդակարգ. հետազոտությունները վկայում են, որ որոշ սննդամթերքներ, օրինակ՝ ածխաջրերով հարուստ մթերքները (հաց, թխվածքաբլիթներ և չիփսեր) կարող են վատթարացնել ակնեի ընթացքը:
• Սթրես. սթրեսն ինքնին ակնե չի առաջացնում, սակայն կարող է վատթարացնել առկա ակնեն:

Ակնեի վերաբերյալ միֆեր

Այս գործոններն ակնեի վրա ունեն միայն թույլ ազդեցություն՝

• շոկոլադ կամ յուղոտ սնունդ
• հիգիենա. ակների պատճառը կեղտոտ մաշկը չէ, իսկ պինդ օճառները և քիմիական նյութերը, հակառակը, կարող են գրգռել մաշկը և վատթարացնել ակնեն)
• կոսմետիկ միջոցներ. հատկապես, եթե յու չեն պարունակում, չեն փակում անցքերը և կանոնավոր հեռացվում են:

Իմացե՛ք ավելին ակնեի մասին հորինվածքների մասին:

Ռիսկի գործոններ

• Տարիք. ակնե կարող է հայտնվել բոլոր տարիքներում, սակայն առավել հաճախ հանդիպում է դեռահասների շրջանում:
• Հորմոնային փոփոխություններ. սեռահասունացումը կամ հղիությունը բնորոշվում են հորմոնային մեծ տեղաշարժերով: Որոշ տվյալներ վկայում են, որ ակնեի վատթարացմանը կարող է նպաստել նաև ձվարանների պոլիկիստոզը:
• Ընտանեկան պատմություն. ակնեի առաջացման մեջ գենետիկան ունի որոշակի դեր: Եթե երկու ծնողն էլ ունեցել են ակնե, նրանց երեխաների մոտ ակնեի հավանականությունը բարձրանում է:
• Ճարպային կամ յուղային նյութեր. ակնե կարող է առաջանալ այն շրջանում, որտեղի մաշկը շփվում է յուղային լոսյոնի կամ նրբաքսուքի հետ (կրեմ):
• Մաշկի վրա ճնշում կամ մաշկի հարում. նման վիճակ կարող են պատճառել հեռախոսները, բջջայինները, սաղավարտները, կիպ օձիքները և ուսապարկերը: