Ակների ախտանիշները տարբեր են՝ կախված հիվանդության ծանրությունից:
Ակնեն կարող է դրսևորվել հետևյալ ցանային տարրերով՝
- սպիտակ կորյակներ (փակ խցանված ծակոտիներ)
- սև կորյակներ (բաց խցանված ծակոտիներ)
- փոքր կարմիր, լարված հանգույցիկներ (պապուլաներ)
- պզուկներ (թարախաբշտիկեր կամ պոստուլաներ), որոնք ծայրին թարախ ունեցող հանգույցիկներ են
- մաշկի տակ մեծ, պինդ և ցավոտ հանգույցներ (նոդուլաներ)
- մաշկի տակ ցավոտ և թարախով բշտեր (թարախաբշտեր կամ կիստաներ):
Ակնեն սովորաբար հայտնվում է դեմքի, ճակատի, կրծքի, թիկունքի և ուսագոտու շրջանում:
Ե՞րբ դիմել բժշկին
Եթե ինքնօգնության միջոցներով ակնեն չի մաքրվում, դիմեք ընտանեկան բժշկին, ով կարող է նշանակել ավելի ուժեղ դեղեր: Եթե ակնեն կայունացել կամ ծանր է, պետք է դիմել մաշկային հիվանդությունների ոլորտում մասնագիտացած բժշկին (մաշկաբան կամ դերմատոլոգ):
Բազմաթիվ կանանց մոտ ակնեն կարող է մնալ տասնամյակներ և հաճախ սրանալ դաշտանից առաջ: Ակնեի այս տեսակը հաճախ առանց բուժման վերանում է այն կանանց մոտ, ովքեր օգտագործում են հակաբեղմնավորիչներ:
Մեծ տարիքով չափահասների մոտ ծանր ակնեի հանկարծակի սկիզբը կարող է ահազանգել բժշկական ուշադրության արժանի մեկ այլ հիվանդության առկայության մասին:
ԱՄՆ Դեղերի և սննդի գործակալությունը (FDA) նախազգուշացնում է, որ հանրաճանաչ և ազատ վաճառվող ակնեի որոշ լոսյոնները, ախտահանիչները և այլ մաշկային ապրանքները հազվադեպ կարող են առաջացնել ծանր ալերգիկ ռեակցիա: Դիմեք անհետաձգելի օգնության, եթե նման միջոցներ օգտագործելուց հետո զարգացել է՝
- ուշագնացություն կամ ուշագնացության զգացում
- օդի պակասի զգացում և հևոց
- աչքերի, դեմքի, շրթունքների կամ լեզվի այտուց
- կոկորդի փակվածության զգացողություն:
Հոդվածը հրապարակվել է՝ 25-05-2021
Վերջին վերանայում՝ 04-04-2024