Ախտանիշներ - Սուր սինուսիտ

Սուր սինուսիտն ընթանում է քթի հարակից խոռոչների բորբոքման ախտանիշներով:

Սուր սինուսիտի գանգատներն ու ախտանիշները հաճախ ներառում են՝

• քթից (քթահոսություն) կամ ըմպանի հետևի մասից (հետքթային հոսք) մածուցիկ, դեղնավուն կամ կանաչավուն լորձային արտադրություն
• փակված կամ խցանված քիթ (քթի փակվածություն), որը դժվարացնում է ձեր քթով շնչելը
• աչքերի շուրջը, այտերի, քթի կամ ճակատի շրջանում ցավ, դիպչելիս՝ ցավոտություն, այտուց և ճնշման զգացում, որը սաստկանում է կռանալիս (գլուխը ներքև կախելիս)։

Այլ գանգատներից կամ ախտանիշներից են՝

• ականջներում ճնշման զգացում
• գլխացավ
• ատամների ցավ
• փոփոխված հոտառություն
• հազ
• բերանի տհաճ հոտ
• հոգնածություն
• ջերմություն:

Ե՞րբ դիմել բժշկին

Սուր սինուսիտով հիվանդ մարդկանց մեծամասնությունը բժշկի դիմելու կարիք չունի:

Կապ հաստատեք ձեր բժշկի հետ, եթե ունեք հետևյալ աշխատնիշներից որևէ մեկը՝

• ախտանիշներ, որոնք տևում են ավելի քան մեկ շաբաթ կամ ավելի
• ախտանիշներ, որոնք վատանում են թվացյալ բարելավումից հետո
• համառ ջերմություն
• կրկնվող կամ քրոնիկ սինուսիտի պատմություն:

Անմիջապես դիմեք բժշկին, եթե ունեք գանգատներ կամ ախտանիշներ, որոնք կարող են վկայել լուրջ վարակի մասին՝

• աչքերի շուրջ ցավ, այտուցն կամ կարմրություն
• բարձր ջերմություն
• շփոթվածություն
• երկտեսություն կամ տեսողության այլ փոփոխություններ
• պարանոցի լարվածություն: