Ախտանիշներ - Ագորաֆոբիա

Ագորաֆոբիան կապված է խուճապային խանգարումների հետ և պատկանում է խանգարումների մի խմբին, որը կոչվում է սպեցիֆիկ ֆոբիաներ:

Իմացե՛ք ավելին սպեցիֆիկ ֆոբիաների մասին:

Ագորաֆոբիայի բնորոշ ախտանիշները ներառում են վախը՝

• տանը մենակ մնալուց
• մարդկանց բազմությունից (ամբոխից) կամ հերթում սպասելուց
• փակ տարածքներից, ինչպիսիք են կինոթատրոնները, վերելակները կամ փոքր խանութները
• բաց տարածքներից, ինչպիսիք են ավտոկայանատեղերը, կամուրջները կամ առևտրի կենտրոնները
• հասարակական տրանսպորտից օգտվելուց, ինչպիսիք են ավտոբուսը, ինքնաթիռը կամ գնացքը:

Այս իրավիճակները անհանգստություն են առաջացնում, քանի որ վախենում եք, որ չեք կարողանա փախչել կամ օգնություն գտնել, եթե սկսեք խուճապ զգալ: Կամ դուք կարող եք վախենալ ունենալ այլ տեսակի անկարողություն կամ ամոթալի ախտանիշներ, ինչպիսիք են գլխապտույտը, ուշագնացությունը, ընկնելը կամ փորլուծությունը:

Ի լրումն՝

• ձեր վախը կամ անհանգստությունը համաչափ չէ իրավիճակի իրական վտանգի հետ
• դուք խուսափում եք իրավիճակից, ուղեկցողի կարիք ունեք կամ էլ դիմանում եք իրավիճակին, սակայն՝ չափազանց վրդովված եք
• դուք ունեք լուրջ խնդիրներ սոցիալական իրավիճակների, աշխատանքի կամ ձեր կյանքի այլ ոլորտների հետ՝ կապված ձեր վախի, անհանգստության հետ կամ խուսափելու պատճառով
• ձեր վախը և խուսափելը սովորաբար տևում են վեց ամիս կամ ավելի երկար:

Խուճապային խանգարում և ագորաֆոբիա

Որոշ մարդիկ ագորաֆոբիայից բացի ունեն խուճապային (պանիկ) խանգարում: Խուճապային խանգարումը տագնապային խանգարման տեսակ է, որը ներառում է խուճապի (պանիկ) նոպաներ կամ գրոհներ: Խուճապի նոպան ծայրահեղ վախի հանկարծակի զգացում է, որը հասնում է գագաթնակետին մի քանի րոպեի ընթացքում և առաջացնում է տարբեր ուժգնության ֆիզիկական (սոմատիկ) ախտանիշներ: Դուք կարող եք մտածել, որ լիովին կորցնում եք վերահսկողությունը, տանում եք սրտամկանի ինֆարկտ կամ նույնիսկ մահանում եք:

Խուճապի նոր նոպայի վախը կարող է հանգեցնել նմանատիպ իրավիճակներից կամ այն վայրերից խուսափելուն, որտեղ նախկինում դա առաջացել է՝ փորձելով կանխել ապագա խուճապային գրոհները:

Խուճապային նոպայի ախտանիշները կարող են ներառել՝

• արագացած սրտազարկ և սրտխփոց
• շնչելու դժվարացում կամ խեղդվելու զգացում
• կրծքավանդակի ցավ կամ ճնշման զգացողություն
• ուշագնացության զգացում կամ գլխապտույտ
• դողի, թմրածության կամ ծակծկոցների զգացում
• չափից շատ քրտնարտադրություն
• հանկարծակի ջերմահորդանք կամ սարսուռ
• ստամոքսի խանգարում կամ փորլուծություն
• վերահսկողության կորստի զգացում
• մահվան վախ:

Իմացե՛ք ավելին խուճապային խանգարման մասին:

Ե՞րբ դիմել բժշկին

Ագորաֆոբիան կարող է լրջորեն սահմանափակել շփվելու, աշխատելու, կարևոր իրադարձությունների մասնակցելու և նույնիսկ առօրյա կյանքի մանրամասները կառավարելու ձեր ունակությունները, ինչպիսիք են գործերը վարելը:

Թույլ մի՛ տվեք, որ ագորաֆոբիան սահմանափակի ձեր աշխարհը: Զանգահարեք ձեր բժշկին կամ հոգեկան առողջության մասնագետին, եթե ունեք ագորաֆոբիայի կամ խուճապի նոպաների ախտանիշներ: