Ալկոհոլամոլություն (ալկոհոլիզմ)

Ալկոհոլն ամբողջ աշխարհում ամենաշատ օգտագործվող կախվածություն առաջացնող նյութն է։

Եթե կարծում եք, որ դուք կամ ձեր ընտանիքի անդամներից կամ մոտիկ ընկերներից մեկնումեկը օգտագործում է չափից դուրս շատ ալկոհոլային խմիչքներ, շատ օգտակար կարող է լինել ալկոհոլի հետ կապված խնդիրների մասին որոշակի գիտելիքներ ստանալը։

Ի՞նչ է ալկոհոլիզմը

Որպես հոգեներգործուն նյութ, ալկոհոլի տևական չարաշահումը կարող է առաջացնել կախվածություն՝ քրոնիկ ալկոհոլիզմ։ Սա հիվանդագին վիճակն է, երբ ստիպված ընդունում եք ալկոհոլ, որ մեղմացնեք կախվածությամբ պայմանավորված տհաճ զգացողություններն ու գանգատները։ Ընդ որում, մշտապես ալկոհոլ օգտագործելու ձեր սովորույթը կարող է ալկոհոլիզմի վերաճել ձեզ համար աննկատ ձևով։

Ալկոհոլիզմի նշանները

Ալկոհոլիզմը կամ ալկոհոլային կախվածությունը բնորոշվում է մի շարք նշաններով, որոնցից ամենակարևորներն են՝

  • ունեք մշտապես ալկոհոլ օգտագործելու ուժեղ, անդիմադրելի ցանկություն, որը հետին պլան է մղում ձեր սովորական առօրյա հետաքրքրություններն ու նախասիրությունները
  • չեք կարողանում վերահսկել օգտագործվող ալկոհոլի չափը
  • ալկոհոլի մշտական օգտագործումը կտրուկ դադարեցնելիս ի հայտ են գալիս ալկոհոլի բացակայությամբ պայմանավորված տհաճ զգացողություններ ու երևույթներ՝ սրտխառնոց, առատ քրտնարտադրություն, դող և անհանգստություն
  • ժամանակի ընթացքում սկսում եք ընդունել ավելի մեծ քանակով ալկոհոլ, որ զգաք նախկին հաճույքը կամ զգացողությունները (ալկոհոլի նկատմամբ տոլերանտության բարձրացման հետանքով)
  • սկսում եք ալկոհոլ ընդունել միայնակ և ձեր ընտանիքի անդամներից ալկոհոլը պահել թաքուն տեղերում
  • ձեր աշխատավայրում, ուսումնական հաստատությունում կամ ընկերների հետ հարաբերություններում առանց որևէ լուրջ պատճառի սկսում եք տեսնել կամ հրահրել խնդիրներ
  • սկսում եք ստել այն մասին, թե ինչ քանակի ալկոհոլ եք ընդունել (կանխամտածված նվազեցնելով իրական չափը)
  • ալկոհոլ օգտագործում եք վաղ առավոտյան կամ սկսել եք անհանգստանալ այն մտքից, թե երբ եք կարողանալու ալկոհոլ օգտագործել
  • մոռանում եք, թե խմած ժամանակ ինչ եք ասել կամ մյուսներն ինչ են ասել կամ ինչի մասին եք զրուցել։

Ալկոհոլիզմի ազդեցությունները

Եթե օգտագործում եք չափից դուրս շատ ալկոհոլ, ձեզ մոտ բարձրանում է այնպիսի ծանր հիվանդությունների առաջացման ռիսկը, ինչպիսիք են սրտի իշեմիկ հիվանդությունը և լյարդի հիվանդությունները, քաղցկեղը, 2-րդ տիպի դիաբետը (շաքարախտ) և ուղեղի ախտահարումը։ Ալկոհոլի չարաշահումը հղի է նաև ճանապարհատրանսպորտային և այլ պատահարների, ընտանեկան բռնության և քրեածին արարքների մեծ վտանգով։

Թեև ալկոհոլի ընդունումից հետո կարող եք զգալ տրամադրության զգալի բարելավում, սակայն ալկոհոլի մշտական չարաշահումը ժամանակի ընթացքում բարձրացնում է դեպրեսիայի և տագնապային խանգարման ռիսկը կամ վատթարացնում այս հիվանդությունների ընթացքը։

Եթե ձեր ընտանիքի անդամներից կամ ընկերներից մեկնումեկը ալկոհոլիկ է, դուք կարող եք զգալ հիասթափություն, գերգրգռվածություն և զայրույթ, անհանգստություն և տագնապ, մեղքի զգացում և սթրես։

Ալկոհոլիզմի բուժումը

Ալկոհոլիզմի բուժման ամենակարևոր սկզբնակետը բժշկի հետ անկեղծ զրուցելն է այն թեմայով, թե ինչպես կարելի է ալկոհոլի օգտագործումը դարձնել վերահսկելի։

Ալկոհոլիզմի բուժման տարբերակը կախված է այն հանգամանքից, թե ինչպիսի ծանրության աստիճանի է հասել ձեր կախվածությունն ալկոհոլից։ Թույլ աստիճանի կախվածության դեպքում գուցե բավարար լինի բժշկի խորհուրդներին հետևելը և հոգեթերապևտիկ որոշ սեանսներին մասնակցելը։ Ավելի ծանր կախվածության դեպքում բժիշկը կարող է նշանակել հատուկ բուժում՝ ուղղված ալկոհոլային զրկանքի համախտանիշի հաղթահարմանը և ձեր վարքի բարելավմանը, օրինակ՝

  • վարքաբանական բուժում՝ ուղղված խնդիրների լուծման հմտությունների տիրապետմանը կամ բարելավմանը
  • դեղերի նշանակում, այդ թվում՝ դետոքսիկացիոն բուժում
  • մասնակցություն ինքնօգնության և օժանդակության ծրագրերին, օրինակ՝ անանուն (անոնիմ) ալկոհոլիկների խմբակներ։

Ալկոհոլիզմի և ալկոհոլի առաջացրած վնասի կանխարգելում

Ալկոհոլիզմի կանխարգելման լավագույն ուղին ալկոհոլի անվնաս կամ ցածր-ռիսկային օգտագործման կանոններին հետևելն է։ Եթե ունեք երեխաներ, ապա զրուցեք նրա հետ թմրամիջոցների, ալկոհոլի և հոգեկան առողջության վերաբերյալ թեմաներով։

Երեխաների համար ձեր իսկ վարքով օրինակելի մոդել հանդիսանալը նույնպես կարող է խիստ օգտակար դառնալ։

Հոդվածը վերանայվել է՝ 25-03-2021