Կանխարգելում - Ալցհեյմերի հիվանդություն

Ալցհեյմերի հիվանդությունը կանխարգելելի վիճակ չէ, սակայն մի շարք ապրելակերպային ռիսկի գործոններ կարող են փոփոխվել:

Փաստերը ցույց են տալիս, որ սրտանոթային հիվանդությունների ռիսկը նվազեցնելու համար քայլեր ձեռնարկելը նաև կարող է նվազեցնել դեմենցիայի (թուլամտության) զարգացման ռիսկը:

Սրտի համար առողջ ապրելակերպի միջոցներին հետևելը կարող է նվազեցնել դեմենցիայի վտանգը: Այս նպատակով՝

• կանոնավոր ֆիզիկական վարժանքներ արեք
• օգտվեք թարմ մթերքներից, առողջարար ձեթերից և հագեցած ճարպերի ցածր պարունակությամբ սննդամթերքից, օրինակ՝ միջերկրածովյան սննդակարգից
• բարձր արյան ճնշումը, դիաբետը և բարձր խոլեստերինը կառավարելու համար հետևեք ձեր բուժման ծրագրին և ձեր բժշկի նշանակումներին ու խորհուրդներին
• եթե ​​ծխում եք, խնդրեք ձեր բժշկին, որ օգնի ձեզ ծխելը թողնելու համար:

Ֆինլանդիայում կատարված մի մեծ, երկարաժամկետ հետազոտություն ցույց է տվել, որ ապրելակերպի փոփոխություններն օգնում են նվազեցնել ճանաչողական (կոգնիտիվ) անկումն այն մարդկանց մոտ, ովքեր դեմենցիայի ռիսկի տակ են: Հետազոտության մասնակիցներին տրվել են անհատական ​​և խմբային սեանսներ, որոնք կենտրոնացած են եղել սննդակարգի, վարժանքների և սոցիալական գործունեության վրա:

Ավստրալիայում կատարված մեկ այլ հետազոտության ժամանակ դեմենցիայի ռիսկի տակ գտնվող մարդկանց տրվել են ուսուցման դասընթացներ սննդակարգի, վարժությունների և ապրելակերպի այլ փոփոխությունների վերաբերյալ: Նրանք ճանաչողական թեստերում ավելի լավ արդյունքներ են ունեցել մեկ, երկու և երեք տարի հետո՝ համեմատած այն մարդկանց հետ, ովքեր չեն ստացել այդ դասընթացները:

Այլ հետազոտությունները ցույց են տվել, որ մտավոր և սոցիալական ներգրավվածությունը կապված է հետագա կյանքում պահպանված մտածողության հմտությունների և Ալցհեյմերի հիվանդության ցածր ռիսկի հետ: Սա ներառում է սոցիալական միջոցառումներին մասնակցելը, ընթերցանությունը, պարը, սեղանի խաղեր խաղալը, արվեստով զբաղվելը, գործիք նվագելը և այլ գործողություններ: