Ինքնօգնություն - Ալցհեյմերի հիվանդություն

Առողջ ապրելակերպի ընտրությունը նպաստում է ընդհանուր լավ առողջությանը:

Դրանք նաևկարող են դեր խաղալ գլխուղեղի առողջության պահպանման գործում:

Վարժանքներ

Կանոնավոր ֆիզիկական վարժանքները բուժման ծրագրի կարևոր մասն են: Ֆիզիկական գործերը, ինչպիսիք են ամենօրյա զբոսանքները, կարող են օգնել տրամադրության բարելավմանը և հոդերի, մկանների և սրտի առողջ վիճակի պահպանմանը: Վարժանքները նաև նպաստում են հանգիստ քնին և կանխում փորկապությունը: Դրանք նաև օգտակար են խնամքի անձնակազմի համար:

Ալցհեյմերի հիվանդությամբ տառապող մարդիկ, ովքեր դժվարանում են քայլել, կարող են դեռևս օգտագործել անշարժ հեծանիվ, ձգվել առաձգական ժապավեններով կամ մասնակցել աթոռի հետ կապված վարժանքներին: Հեռուստատեսությամբ, ինտերնետում կամ DVD սկավառակներով կարող եք գտնել վարժանքների ծրագրեր, որոնք նախատեսված են տարեցների համար:

Սնուցում

Ալցհեյմերի հիվանդությամբ մարդիկ կարող են մոռանալ ուտել, կորցնել հետաքրքրությունը սննդի նկատմամբ կամ չօգտագործել առողջ սնունդ: Նրանք նաև կարող են մոռանալ բավականաչափ ջուր խմել, ինչը հանգեցնի ջրազրկման և փորկապության: Առաջարկեք հետևյալը։

• Առողջ ընտրանքներ. գնեք սիրելի առողջ սննդի տարբերակները, որոնք հեշտ է ուտել:
• Ջուր և այլ առողջարար ըմպելիքներ. խրախուսեք ամեն օր մի քանի բաժակ հեղուկ խմելը: Խուսափեք կոֆեին պարունակող ըմպելիքներից, որոնք կարող են մեծացնել անհանգստությունը, խանգարել քունը և առաջացնել հաճախակի միզելու պահանջ:
• Բարձր կալորիականությամբ, առողջարար շեյքեր և սմուզիներ. առաջարկեք սպիտակուցային փոշիներով կաթնային կոկտեյլներ կամ պատրաստեք սմուզիներ: Սա օգտակար է, երբ ուտելը դառնում է ավելի դժվար:

Սոցիալական ներգրավվածություն և գործունեություն

Սոցիալական գործունեությունը կարող է օժանդակել պահպանված հմտություններին և կարողություններին: Դրանք նաև օգնում են ընդհանուր բարեկեցությանը: Արեք այնպիսի բաներ, որոնք իմաստալից են և հաճելի: Դեմենցիայով մարդը կարող է՝

• լսել երաժշտություն կամ պարել
• կարդալ կամ լսել գրքեր
• զբաղվել այգեգործությամբ կամ որևէ արհեստով
• մասնակցել սոցիալական միջոցառումներին տարեցների կամ հիշողության խնամքի կենտրոններում
• որոշակի գործողություններ կատարել երեխաների հետ:

Այլընտրանքային բժշկություն

Բուսական միջոցները, վիտամինները և այլ հավելումները լայնորեն գովազդվում են ճանաչողական (կոգնիտիվ) առողջության կամ Ալցհեյմերի հիվանդությունը կանխելու կամ հետաձգելու համար: Սակայն կլինիկական փորձարկումները տալիս են տարբեր արդյունքներ: Քիչ ապացույցներ կան, որոնք հաստատում են այս մոտեցումների՝ որպես արդյունավետ բուժում լինելու փաստը:

Վերջերս հետազոտված որոշ բուժումներ ներառում են հետևյալը:

• Վիտամին E. 9նայած վիտամին E-ն չի կանխում Ալցհեյմերի հիվանդությունը, օրական 2000 միջազգային միավոր (ՄՄ) ընդունելը կարող է օգնել ախտանիշների վատթարացման հետաձգմանն այն մարդկանց մոտ, ովքեր արդեն ունեն թեթև և միջին ծանրության հիվանդություն: Այնուամենայնիվ, ուսումնասիրության արդյունքները տարբեր են, և միայն որոշներն են ցույց տվել թեթև օգուտներ: Լրացուցիչ հետազոտություններ կպահանջվեն դեմենցիայով հիվանդ պոպուլյացիայի մեջ օրական 2000 ՄՄ վիտամին E-ի անվտանգության վերաբերյալ՝ նախքան այն կանոնավոր կերպով առաջարկելը: Ճանաչողական (կոգնիտիվ) առողջությանը նպաստող հավելումները կարող են փոխազդել այն դեղերի հետ, որոնք ընդունում եք Ալցհեյմերի հիվանդության կամ առողջական այլ վիճակների համար: Անվտանգ բուժման ծրագիր մշակելու համար սերտորեն աշխատեք ձեր բժշկական անձնակազմի հետ: Տեղեկացրեք բժիշկներին ձեր դեղատոմսերի և ցանկացած դեղամիջոցի կամ հավելումների մասին, որն ընդունում եք առանց դեղատոմսի:
• Օմեգա-3 ճարպաթթուներ. ձկան մեջ կամ հավելումներում պարունակվող օմեգա-3 ճարպաթթուները կարող են նվազեցնել դեմենցիայի զարգացման ռիսկը: Սակայն կլինիկական հետազոտությունները ոչ մի օգուտ չեն ապացուցել Ալցհեյմերի հիվանդության ախտանիշների բուժման համար:
• Կուրկումին. այս խոտաբույսն ունի հակաբորբոքային և հակաօքսիդանտային հատկություններ, որոնք կարող են ազդել գլխուղեղի քիմիական գործընթացների վրա: Մինչ այժմ կլինիկական փորձարկումները ոչ մի օգուտ չեն գտել Ալցհեյմերի հիվանդության բուժման համար:
• Գինկգո. Գինկգոն բուսական արտամզվածք է: ԱՄՆ Առողջապահության ազգային ինստիտուտի կողմից ֆինանսավորվող խոշոր հետազոտությունը ոչ մի ազդեցություն չի հայտնաբերել Ալցհեյմերի հիվանդության կանխարգելման կամ հետաձգման գործում:
• Մելատոնին. այս հավելումը օգնում է քնի կարգավորմանը։ Այն ուսումնասիրվում է՝ պարզելու, թե արդյոք կարող է օգնել դեմենցիայով տառապող մարդկանց քնի խնդիրների մեղմացմանը: Սակայն որոշ հետազոտություններ ցույց են տվել, որ մելատոնինը կարող է դեմենցիա ունեցող որոշ մարդկանց մոտ վատթարացնել տրամադրությունը: Անհրաժեշտ է ավելի շատ հետազոտություն: