Տագնապային խանգարումներ․ պատճառներ

Տագնապային խանգարումներ․ պատճառներ

Տագնապի պատճառները և այն հարցը, թե ինչու են անհանգստ​ությունն ու տագնապը բացասաբար անդրադառնում որոշ անձանց ​կյանքի վրա, մինչև վերջ պարզաբանված չեն։

Իհարկե, կոնկրետ իրավիճակներում դրսևորվող տագնապի որոշ աստիճանն օգնում է մեզ, որ մեծանանք անվտանգ և մեզ պաշտպանելու տեսանկյունից գնահատենք ռիսկը։

Երբ տագնապը դառնում է առողջական խնդիր, այսպես կոչված «համարժեք պատասխանները» սկսում է դրսևորվել ավելի հաճախ և այնպիսի իրավիճակներում, երբ դրանց անհրաժեշտությունն այլևս օգտակար չէ։

Կան տագնապի ախտանիշների առաջացմանը և հետագայում տագնապային խանգարումների ձևավորմանը նպաստող բազմաթիվ գործոններ։ Անհանգստացող բնավորությամբ բազմաթիվ մարդիկ հավանաբար ծնվում են տագնապային խանգարման զարգացման նկատմամբ ժառանգական նախատրամադրվածությամբ։

Տագնապի կարևոր պատճառները ներկայացվում են ստորև։

Հոգեկան առողջության խնդիրների վերաբերյալ ընտանեկան պատմություն

Հոգեկան առողջության խնդիրներին առնչվող ընտանեկան պատմությունը կարող է լինել «հիվանդագին» տագնապի առաջացմանը նպաստող գործոն։ Բայց սա չի նշանակում, որ եթե ձեր ընտանիքում կան հոգեկան առողջության խնդիրներով մարդիկ, ձեզ մոտ պետք է տագնապային խանգարում զարգանա։

Մշտական սթրեսային իրավիճակներ

Երկարատև շարունակվող սթրեսային վիճակների օրինակներ են աշխատանքային խնդիրները կամ փոփոխությունները, անկայուն աշխատավարձը, ընտանեկան անախորժությունները, հարաբերությունների խզումը և վիշտը։ Եթե դուք ենթարկվել եք ֆիզիկական, սեռական կամ «խոսքային» բռնությունների, առնչվել եք ձեր կյանքին սպառնացող իրադարձությունների հետ կամ ունեցել եք հղիություն և ծննդաբերություն, ապա կարող եք լինել ռիսկի խմբում։

Ֆիզիկական առողջության խնդիրներ

Ֆիզիկական առողջության խնդիրները կարող են հանդես գալ որպես տագնապային խանգարումների հիմքում ընկած պատճառներ։ Ասթմա, դիաբետ, սրտային հիվանդություններ կամ հորմոնային շեղումներ, օրինակ՝ վահանաձև գեղձի խնդիրներ ունեցող մարդկանց հատուկ է տագնապի զգացումը։ Որոշ դեպքերում տագնապի ախտանիշները լինում են որևէ ֆիզիկական հիվանդության առաջին նշանները։

Ալկոհոլի և թմրամիջոցների չարաշահում

Հոգեներգործուն նյութերի, մասնավորապես, կանեփի, ամֆետամինների, ալկոհոլի և քնաբերների չարաշահումը կարող է նպաստել տագնապի ախտանիշների դրսևորմանը։ Թմրամիջոցների և ալկոհոլի օգտագործման կտրուկ դադարեցումն իր հերթին կարող է առաջացնել զրկանքի հետ կապված տագնապ։

Կոֆեին

Կոֆեինը, ինչպես նաև դեղատոմս չպահանջող և բուսական ծագման որոշ դեղերը որոշ դեպքերում կարող են առաջացնել տագնապի ախտանիշներ։

Անձի տիպեր

Անձի որոշ տիպերը, օրինակ՝ պերֆեկցիոնիստները (ովքեր ձգտում են կատարելության, խուսափում են անորոշություններից և ձգտում են հավասարակշռության) կամ նրանք, ովքեր կարիք ունեն լինել հսկողության ներքո, տագնապի նկատմամբ ավելի խոցելի են։

Յուրաքանչյուր մարդ տարբերվում է մյուսից, և հաճախ ոչ թե մեկ գործոն, այլ դրանց զուգակցումն է նպաստում տագանապի վիճակի զարգացմանը։ Անկախ ձեզ մոտ տագնապի առաջացման պատճառից կամ պատճառներից, բժշկի և հոգեկան առողջության մասնագետի հետ զրույցն առաջին քայլն է, որ ստանաք ճիշտ աջակցություն և հասկանաք բուժման հնարավոր տարբերակները։

Հոդվածը վերանայվել է՝ 02-02-2021