Տագնապային խանգարումներ․ բուժում

Տագնապային խանգարումներ․ բուժում

Եթե ունեք տագնապային խանգարում, ապա կարևոր է հիշել, որ դուք միայնակ չեք․ կան ծառայություններ, բժիշկներ և օժանդակության ծրագրեր, որոնց նպատակն է ձեր վիճակում հայտնված մարդկանց օգնելը։

Առաջին քայլը հաստատված ախտորոշումն է, որին խիստ կօգնի բժշկի հետ ձեր անկեղծ զրույցը։

Տագնապի արդյունավետ բուժման ձեզ առաջարկվող մեթոդները կախված են ինչպես ձեզնից, այնպես էլ տագնապային խանգարման ծանրության աստիճանից։ Թույլ տագնապի ժամանակ կարող է օգտակար լինել ապրելակերպի փոփոխությունները, մինչդեռ ավելի ծանր դեպքերում կարող են պահանջվել դեղեր։

Հիվանդությունից ապաքինվելը հնարավոր է միայն ախտանիշները ճիշտ վերահսկելու միջոցով։ Ստորև հակիրճ ներկայացնում ենք տագնապային խանգարման բուժման հիմնական ուղղություններն ու մեթոդները։

  • Կոգնիտիվ-վարքաբանական բուժում (ԿՎԲ). ԿՎԲ-ն ներառում է տագնապ առաջացնող խնդրահարույց մտածողության բնույթի փոփոխությունները։ ԿՎԲ բաղադրիչներից է վարքաբանական բուժումը, որը ներառում է «դեսենսիտիզացիան»՝ մեթոդ, որի նպատակն է տագնապ առաջացնող իրավիճակների նկատմամբ ձեր «զգայունության» դանդաղ և անվտանգ նվազեցումը։
  • Շնչառական և ռելաքսիացոն մեթոդներ. շնչառական և ռելաքսացիոն մեթոդները հատուկ կարևորություն են ստանում տագնապի ֆիզիկական ախտանիշները մեղմացնելու, իսկ շնչառական վարժությունները՝ խուճապի գրոհներն արդյունավետ կերպով հանելու համար։ Որոշ մարդկանց համար տագնապի վերահսկման գործում կարող են օգտակար լինել նաև մեդիտացիայի մեթոդները։
  • Չափավոր վարժանքներ. վարժանքները, նույնիսկ 10 րոպեանոց կարճատև քայլքը կարող են օգնել ձեր զգացումների բարելավմանը և ընդհանուր հոգնածության մեղմացմանը։ Վարժանքներն օգնում են, որ խթանվի օրգանիզմում սերոտոնինի արտադրությունը, որը համարվում է «լավ զգալու» հորմոն։ Եթե երկար ժամանակ վարժանքներ չեք արել, ապա խորհրդակցեք ձեր բժշկի հետ, եթե ունեք որևէ այլ առողջական խնդիր։ Ձեր ֆիզիկական ակտիվությունը կարող եք բարձրացնել նաև տրաբեր, օրինակ՝ այգեգործական կամ տնայնագործական զբաղմունքների միջոցով։
  • Կրճատե՛ք կոֆեինի քանակը. որոշ մարդկանց մոտ կոֆեինը կարող է սաստկացնել տագնապը։ Այն կարող է խանգարել քնելու գործընթացը և թույլ չտալ, որ գիշերները լիարժեք հանգստանաք, ինչն իր հերթին կարող է սրացնել ձեր ախտանիշները։ Կոֆեինը կարող է նաև հաճախացնել ձեր սրտազարկը։ Փորձեք կրճատել ձեր սննդակարգում կոֆեինի քանակները։ Քչացրեք թեյի և սուրճի ընդունումը՝ դրանք փոխարինելով ջրով և մրգահյութերով։ Խուսափեք նաև երեկոյան ժամը 6-ից հետո կոֆեին պարունակող սննդամթերքներ օգտագործելուց՝ շոկոլադ, կոլա կամ էներգետիկ ըմպելիքներ, որոնք կարող են խանգարել ձեր քունը։
  • Չափավորե՛ք ալկոհոլի օգտագործումը. տագնապ զգալիս կարող եք մտածել, որ սովորականից շատ ալկոհոլ օգտագործելով կկարողանաք թուլացնել ձեր ներքին լարվածությունը։ Իրականում, ալկոհոլը կարող է ավելի վատացնել ձեր վիճակը, ուստի փորձեք չանցնել ալկոհոլի չափավոր քանակները։
  • Մի՛ ծխեք. եթե ծխող եք, ապա ծխախոտից ձերբազատվելը կբարելավի ձեր ընդհանուր առողջական վիճակը և ինքնազգացողությունը։
  • Դեղեր. եթե վերոնշյալ մեթոդները բավարար չափով չեն մեղմացնում կամ վերացնում ձեր տագնապը, ապա բժիշկը կարող է նշանակել որոշ դեղեր, օրինակ՝ տագնապամարիչներ կամ հակադեպրեսանտներ։ Ընդ որում, դեղերը ոչ թե փոխարինում, այլ լրացնում են վերոնշյալ մեթոդները։

Առաջարկում ենք նաև դիտել տագնապի վերաբերյալ մեր տեսահոլովակ։

Հոդվածը վերանայվել է՝ 08-05-2021