Տագնապային խանգարումներ․ ախտորոշում

1 րոպե

​Տագնապային խանգարումը ժամանակին և ճիշտ ախտորոշելու լավագույն ուղին ձեր ախտանիշները բժշկին կամ հոգեկան առողջության մասնագետին մանրակրկիտ նկարագրելն է։​

Ձեզ կտան տարբեր հարցեր․ որքան մանրամասն պատասխանեք այդ հարցերին, այդքան ավելի լավ։

Ախտորոշման գործընթացում բժիշկները և հատկապես հոգեկան առողջության մասնագետները հաճախ օգտագործում են հարցաշար, որ գնահատեն ձեր ախտանիշները՝ համադրելով դրանք տագնապային խանգարումների ախտորոշիչ չափանիշների հետ, ինչպիսին հանդիսանում է Հոգեկան հիվանդությունների ախտորոշիչ և վիճակագրական ձեռնարկի 5-րդ խմբագրումը (DSM-5)։

Տագնապն ախտորոշվում է, եթե ախտանիշներն ազդում են տարբեր ոլորտներում ձեր գործունեության վրա՝ աշխատանք, դպրոց կամ հասարակություն։ Հարցաշարը մասնագետին օգնում է նաև, որ նա ստուգի ձեզ մոտ դեպրեսիայի առկայությունը և հոգեկան առողջության խնդրի ծանրության աստիճանը։

Մասնագետները տագնապային խանգարման յուրաքանչյուր տեսակի համար կարող են օգտագործել հատուկ հարցաշար։ Թեև այս և նմանատիպ հարցաշարերով տագնապի գնահատումը կարող է ձեզ թվալ ձանձրալի, այնուամենայնիվ, ախտորոշումը հիվանդության ընթացքը հսկողության տակ վերցնելու առաջին քայլն է։

Օգտակար կարող է լինել նաև բժշկին այցելելուց առաջ նոթատետրում ձեր ախտանիշների վերաբերյալ նշումներ կատարելը։ Գրառումները կօգնեն, որ ձեր գանգատները և մտահոգությունները բժշկին ներկայացնելիս որևէ կարևոր ասելիք չմոռանաք։