Բուժում - Աֆթոզ ստոմատիտ

Աննշան կամ փոքր խոցերի դեպքում, որոնք հակված են ինքնուրույն մաքրվել մեկ կամ երկու շաբաթվա ընթացքում, սովորաբար բուժում անհրաժեշտ չէ:

Սակայն, խոշոր, համառ կամ անսովոր ցավոտ խոցերը հաճախ բուժօգնության կարիք ունեն: Կան բուժման մի շարք տարբերակներ:

Բերանի ողողումներ

Եթե ունեք մի քանի աֆթոզ խոցեր, ձեր բժիշկը կարող է նշանակել բերանի ողողում բուժիչ լուծույթով, որը պարունակում է Դեքսամետազոն ստերոիդ դեղամիջոց՝ ցավն ու բորբոքումը նվազեցնելու համար կամ Լիդոկաին՝ ցավը նվազեցնելու համար:

Տեղային օգտագործման արտադրանքներ

Որոշ սովորական և ավելի ուժեղ ազդող արտադրանքները (մածուկներ, քսուքներ, գելեր կամ հեղուկներ) կարող են օգնել թեթևացնելու ցավը և արագացնելու բուժումը, եթե դրանք կիրառվեն նոր հայտնված խոցերի վրա: Որոշ արտադրանքներ ունեն ակտիվ բաղադրիչներ, ինչպիսիք են՝

• Բենզոկաին (Անբեսոլ, Կանկ-А, Օրաբաս, Զիլակտին-B)
• Ֆլուոցիոնիդ (Լիդեքս, Վանոս)
• Ջրածնի պերօքսիդ (Պերօքսիլ և այլն):

Կան աֆթոզ խոցերի բուժման բազմաթիվ այլ արտադրանքներ, այդ թվում՝ առանց ակտիվ բաղադրիչների: Հարցրեք ձեր բժշկին կամ ատամնաբույժին, թե որոնք կարող են լավագույնս ազդել ձեր դեպքում:

Բերանային (օրալ) դեղամիջոցներ

Բերանային դեղամիջոցները կարող են օգտագործվել, երբ խոցերը ծանր են կամ չեն արձագանքում տեղային բուժմանը: Դրանք կարող են ներառել հետևյալը:

• Դեղեր, որոնք հատուկ նախատեսված չեն աֆթոզ խոզերի բուժման համար, օրինակ՝ Սուկրալֆատը (Կարաֆատ), որը նախատեսված է աղիքային խոցի բուժման համար և Կոլխիցինը, որը սովորաբար օգտագործվում է պոդագրայի բուժման համար:
• Բերանային ստերոիդային դեղամիջոցներ, երբ ծանր խոցերը չեն արձագանքում այլ բուժումներին: Սակայն, լուրջ կողմնակի ազդեցությունների պատճառով դրանք սովորաբար վերջին միջոցն են:

Խոցերի այրում

Այս դեպքում օգտագործվում է գործիք կամ քիմիական նյութ՝ հյուսվածքը այրելու, չորացնելու կամ ոչնչացնելու համար:

• Դեբակտերոլը տեղային լուծույթ է, որը նախատեսված է աֆթոզ խոցերի և լնդերի խնդիրների բուժման համար: Քիմիապես այրելով խոցերը՝ այս դեղամիջոցը կարող է նվազեցնել ապաքինման ժամանակը մինչև մոտ մեկ շաբաթ:
• Արծաթի նիտրատը, որն աֆթոզ խոցի քիմիական այրման ևս մեկ տարբերակ է, ցույց չի տրվել, որ արագացնում է ապաքինումը, սակայն կարող է օգնել ցավի թեթևացմանը:

Սննդանյութային հավելումներ

Ձեր բժիշկը կարող է նշանակել սննդային հավելումներ, եթե օգտագործում եք կարևոր սննդանյութերի ցածր քանակներ, ինչպիսիք են ֆոլատը (ֆոլաթթու), վիտամին B6, վիտամին B12 կամ ցինկ:

Փոխկապված առողջական խնդիրներ

Եթե ձեր աֆթոզ ստոմատիտը կապված է ավելի լուրջ առողջական խնդրի հետ, ձեր բժիշկը կբուժի հիմքում ընկած վիճակը կամ հիվանդությունը: