Պատճառներ - Աթերոսկլերզ

Աթերոսկլերոզը դանդաղորեն վատթարացող հիվանդություն է, որը կարող է սկսվել ընդհուպ մանկական տարիներից:

Աթերոսկլերոզի հստակ պատճառը հայտնի չէ: Այն կարող է սկսվել զարկերակի ներքին շերտի՝ լորձաթաղանթի վնասումից կամ վնասվածքից: Վնասման պատճառ կարող են դառնալ՝

• բարձր արյան ճնշում
• բարձր խոլեսթերին
• բարձր տրիգլիցերիդներ՝ արյան ճարպի (լիպիդ) տեսակներից մեկը
• ծխախոտի օգտագործում (ծխելը կամ ծամելը)
• դիաբետ
• ինսուլինակայունություն
• գիրություն
• բորբոքում՝ անհայտ պատճառի կամ հիվանդություններով պայմանավորված, ինչպիսիք են՝ հոդաբորբ (արթրիտ), համակարգային կարմիր գայլախտ (լուպուս), փսորիազ կամ աղիների բոբոքային հիվանդություն:

Երբ զարկերակի ներքին պատը վնասվում է, արյան բջիջները և այլ նյութերը կարող են կուտակվել վնասված մասում և «նստել» զարկերակի ներքին թաղանթի վրա:

Ժամանակի ընթացքում ճարպերը, խոլեսթերինը և այլ նյութերը նույնպես կուտակվում են զարկերակի ներքին պատի վնասված շրջանում: Այսպիսի «նստվածքը» կոչվում է «վահանիկ»: Վահանիկը կարող է նեղացնել զարկերակները և շրջափակել արյան հոսքը: Օրինակ, սրտի պսակային զարկերակների աթերոսկլերոտիկ նեղացումը կարող է առաջացնել կրծքահեղձուկ (ստենոկարդիա), իսկ գլխուղեղի անոթների նեղացումը՝ տրանզիտոր իշեմիկ գրոհ:

Վահանիկը նաև կարող է պատռվել՝ բերելով արյան մակարդուկի (թրոմբ) ձևավորման և զարկերակի լրիվ խցանման: Նույն վերևի օրինակով, սրտի պսակային զարկերակների խցանումը բերում է սրտամկանի ինֆարկտի, իսկ ուղեղային զարկերակների խցանումը՝ իշեմիկ ինուլտի:

Ընդ որում, մակարդուկը կարող է զարկերակի լուսանցքը խցանել ոչ միայն վնասված մասում, այլև արյան հունով տեղափոխվել մարմնի այլ շրջաններ և խցանել մեկ այլ օրգանի զարկերակները (թրոմբոէմբոլիա):

Ռիսկի գործոններ

Զարկերակների պնդացումը զարգանում է տարիների ընթացքում: Ծերացումն աթերոսկլերոզի ռիսկի գործոններից մեկն է: Այլ գործոններ նույնպես կարող են բարձրացնել աթերոսկլերոզի ռիսկը կամ արագացնել զարկերակների աթերոսկլերոտիկ ախտահարումը: Դրանցից ամենակարևորներն են՝

• վաղ սրտային հիվանդության ընտանեկան պատմություն (ժառանգականություն)
• ոչ առողջ սննդակարգ, օրինակ՝ հագեցած կամ «տրանս» ճարպերով, շաքարով և աղով հարուստ
• դիաբետ (շաքարախտ)
• բարձր արյան ճնշում (հիպերտենզիա)
• բարձր խոլեսթերին
• բորբոքման մարկեր հանդիսացող C-ռեակտիվ սպիտակուցի (CRP) բարձր մակարդակներ
• ֆիզիկական թերակտիվություն («նստակյաց» ապրելակերպ)
• գիրություն
• քնի ապնոէ
• ծխախոտի օգտագործում (ծխելը կամ ծամելը):