Ինքնօգնություն - Աթերոսկլերզ

Ապրելակերպի որոշակի փոփոխություններ անելը կարող է օգնել զարկերակների առողջության պահպանմանը կարող է կանխել կամ դանդաղեցնել աթերոսկլերոզը:

Փորձեք սրտի համար առողջարար այս խորհուրդները:

• Մի՛ ծխեք. ծխելը վնասում է զարկերակները։ Ծխելը ՍԻՀ հիմնական ռիսկի գործոնն է: Նիկոտինը կծկում է արյունատար անոթները և ստիպում սրտին ավելի ուժեղ աշխատել։ Չծխելը աթերոսկլերոզի բարդությունների, այդ թվում՝ սրտամկանի ինֆարկտի ռիսկի նվազեցման լավագույն միջոցներից մեկն է:
• Շաբաթվա օրերի մեծ մասը ֆիզիկապես ակտիվ եղեք. կանոնավոր վարժանքները բարելավում են արյան հոսքը, նվազեցնում արյան ճնշումը և կրճատում են այնպիսի վիճակների ռիսկը, որոնք մեծացնում են աթերոսկլերոզի և սրտային հիվանդության ռիսկը: Զբաղվեք առնվազն 150 րոպե չափավոր աերոբիկ ակտիվությամբ կամ շաբաթական 75 րոպե ակտիվ աերոբիկ ակտիվությամբ կամ երկուսի զուգակցմամբ: Դուք կարող եք վերելակի փոխարեն բարձրանալ աստիճաններով, ճաշի ժամին քայլել աշխատավայրի մոտակայքում կամ հեռուստացույց դիտելիս մի քանի կքանիստ կամ այլ վարժանքներ անել:
• Պահպանեք առողջ քաշը. ավելորդ քաշը մեծացնում է ՍԻՀ վտանգը, որի պատճառը պսակային զարկերակների աթերոսկլերոզն է։ Նույնիսկ փոքր չափի քաշի կորուստը կարող է օգնել ռիսկի նվազեցմանը:
   
• Կերեք առողջ սնունդ. սրտի համար առողջարար սննդակարգը, որը հարուստ է մրգերով, բանջարեղեններով և ամբողջահատիկավոր մթերքներով, ինչպես նաև աղքատ է ռաֆինացված (զտված) ածխաջրերով, շաքարներով, հագեցած ճարպերով և նատրիումով, կարող է օգնել քաշի, արյան ճնշման, խոլեստերինի և արյան շաքարի վերահսկմանը: Փորձեք սպիտակ հացը փոխարինել ամբողջահատիկ հացահատիկային հացով: Որպես խորտիկ վերցրեք խնձոր, բանան կամ գազարի ձողիկներ: Աղի և ճարպի քանակությունը ստուգելու համար կարդացեք սննդային պիտակները: Օգտագործեք մոնոչհագեցած ճարպեր, օրինակ՝ ձիթապտղի յուղ: Նվազեցրեք կամ խուսափեք շաքարավազից և շաքարի փոխարինիչներից:
• Կառավարեք սթրեսը. գտեք եղանակներ, որոնք կօգնեն նվազեցնել հուզական սթրեսը: Ավելի շատ ֆիզիկական վարժություններ կատարելը, գիտակցվածությամբ զբաղվելը և աջակցող խմբերում ուրիշների հետ կապ հաստատելը սթրեսը մեղմելու որոշ միջոցներ են: Ռելաքսացիայի մեթոդները, ինչպիսիք են յոգան կամ խորը շնչառությունը, նույնպես կարող են օգտակար լինել: Այս մեթոդները կարող են ժամանակավորապես իջեցնել արյան ճնշումը՝ նվազեցնելով աթերոսկլերոզի զարգացման ռիսկը:

Եթե ունեք բարձր խոլեստերին, բարձր արյան ճնշում, դիաբետ կամ այլ քրոնիկ հիվանդություն, աշխատեք ձեր բժշկի հետ՝ կառավարելու վիճակը և նպաստելու ձեր ընդհանուր առողջության բարելավմանը:

Այլընտրանքային բժշկություն

Ենթադրվում է, որ որոշ սննդամթերքներ և բուսական հավելումներ կարող են օգնել խոլեստերինի բարձր մակարդակի և բարձր արյան ճնշման նվազեցմանը, որոնք աթերոսկլերոզի զարգացման երկու հիմնական ռիսկային գործոններն են: Այլընտրանքային բժշկության հավելումները և արտադրանքները, որոնք կարող են արդյունավետ լինել աթերոսկլերոզի համար, ներառում են հետևյալը՝

• ալֆա-լինոլենաթթու
• գարի
• բետա-սիտոստերոլ (գտնվում է հավելումների և որոշ մարգարինների մեջ, օրինակ՝ Promise Activ)
• շիկ պսիլիում (հայտնաբերվում է սերմերի կեղևում և այնպիսի արտադրանքներում, ինչպիսին է Metamucil-ը)
• կալցիում
• կակաո
• ձկան յուղ
• սխտոր
• կանաչ թեյ
• վարսակի թեփ (առկա է վարսակի ալյուրի և ամբողջահատիկ վարսակի մեջ)
• սիտոստանոլ (հայտնաբերվում է հավելումների և որոշ մարգարինների մեջ, ինչպիսիք են Բենեկոլը):

Զրուցեք ձեր բժշկի հետ նախքան ձեր աթերոսկլերոզի բուժման մեջ այս կամ այլ հավելումները ավելացնելը: Որոշ հավելումներ կարող են փոխազդել դեղամիջոցների հետ՝ առաջացնելով վնասակար կողմնակի ազդեցություններ: