Գրադարան

Մեղվի խայթոց. ախտանիշներ

Մեղվի խայթոց. ախտանիշներ

Time Read 3 րոպե

Մեղվի խայթոցը կարող է առաջացնել տարբեր ռեակցիաներ՝ սկսած ժամանակավոր ցավից և անհանգստությունից մինչև ծանր ալերգիկ ռեակցիա:

Մեկ տեսակի ռեակցիա ունենալը չի նշանակում, որ դուք միշտ կունենաք նույն ռեակցիան ամեն անգամ, երբ ձեզ մեղու է խայթել կամ որ հաջորդ ռեակցիան անպայմանորեն ավելի սուր կլինի:

Թեթև ռեակցիա

Ավելի հաճախ մեղուների խայթոցի ախտանիշներն աննշան են և ներառում են՝

  • ակնթարթային, սուր այրվող ցավ խայթոցի տեղում
  • կարմիր նշան՝ բուն խայթոցի տեղում
  • թեթև այտուցվածություն՝ խայթոցի շուրջ:

Մարդկանց մեծ մասի մոտ այտուցն ու ցավն անհետանում են մի քանի ժամվա ընթացքում:

Չափավոր ռեակցիա

Որոշ մարդկանց մոտ, ում խայթել են մեղու կամ այլ միջատներ, ունեն մի փոքր ավելի ուժեղ ռեակցիա հետևյալ գանգատներով և ախտանիշներով՝

  • խիստ կարմրություն
  • խայթոցի տեղում այտուցվածություն, որն աստիճանաբար մեծանում է հաջորդ կամ երկու օրվա ընթացքում:

Չափավոր ռեակցիաները հակված են ինքնուրույն անցնելու հինգից 10 օրվա ընթացքում: Չափավոր ռեակցիա ունենալը չի նշանակում, որ հաջորդ անգամ խայթելու դեպքում դուք կունենաք ծանր ալերգիկ ռեակցիա: Սակայն, որոշ մարդկանց մոտ ամեն անգամ խայթոց ունենալիս միմյանց նմանվող չափավոր ռեակցիաներ են զարգանում: Եթե դա պատահի ձեզ հետ, խոսեք ձեր բժշկի հետ բուժման և կանխարգելման մասին, հատկապես, եթե ռեակցիան ամեն անգամ ավելի սուր է դառնում:

Ծանր ալերգիկ ռեակցիա

Մեղվի խայթոցի ծանր ալերգիկ ռեակցիան (անաֆիլաքսիա) հնարավոր վտանգ է ներկայացնում կյանքի համար և պահանջում է շտապ բուժում: Մեղվի կամ այլ միջատի խայթոցից մարդկանց մի փոքր տոկոսի մոտ արագ զարգացում է անաֆիլաքսիա: Անաֆիլաքսիայի գանգատներն ու ախտանիշները ներառում են՝

  • մաշկային ռեակցիաներ, ինչպիսիք են եղնջացանը և քորը, կարմրած կամ գունատ մաշկ
  • դժվարաշնչություն և հևոց
  • կոկորդի և լեզվի այտուցվածություն
  • թույլ, արագացած անոթազարկ (պուլս)
  • սրտխառնոց, փսխում կամ փորլուծություն
  • գլխապտույտ կամ ուշագնացություն
  • գիտակցության կորուստ:

Մարդիկ, ովքեր մեղվի խայթոցի նկատմամբ դրսևորում են ծանր ալերգիկ ռեակցիա, հաջորդ անգամ խայթոց ստանալիս անաֆիլաքսիայի հավանականությունը կազմում է 25%-65%: Խոսեք ձեր բժշկի կամ ալերգոլոգի հետ կանխարգելիչ միջոցառումների մասին, ինչպիսիք են իմունոթերապիան («ալերգիայի դեմ պատվաստումներ»), որ խուսափեք նմանատիպ ռեակցիայից, եթե նորից ձեզ մեղու խայթի:

Իմացե՛ք ավելին անաֆիլաքսիայի մասին:

Բազմաթիվ մեղուների խայթոցներ

Ընդհանուր առմամբ, միջատները, ինչպիսիք են մեղուները և կրետները, ագրեսիվ չեն և խայթում են միայն ինքնապաշտպանության համար: Շատ դեպքերում դա հանգեցնում է մեկ կամ գուցե մի քանի խայթոցի: Այնուամենայնիվ, որոշ դեպքերում, հատկապես երբ մարդը խախտում է փեթակը կամ մեղուների պարսը, կարող է ստանալ բազմաթիվ խայթոցներ: Մեղուների որոշ տեսակներ, ինչպիսիք են աֆրիկյան մեղվաճանճերը, ավելի հավանական է, որ խմբով խայթեն: Եթե ձեզ ավելի քան մեկ տասնյակ անգամ խայթեն, թույնի կուտակումը կարող է թունավոր (տոքսիկ) ռեակցիա առաջացնել, և ձեզ վատ զգաք: Գանգատներն ու ախտանիշները ներառում են՝

  • սրտխառնոց, փսխում կամ փորլուծություն
  • գլխացավ
  • պտտման զգացողություն (վերտիգո)
  • ցնցումներ
  • ջերմություն
  • գլխապտույտ կամ ուշագնացություն:

Բազմաթիվ խայթոցները կարող են պահանջել անհետաձգելի բուժօգնություն երեխաների, տարեցների և սրտի կամ շնչառական խնդիրներ ունեցող մարդկանց դեպքում:

Ե՞րբ դիմել բժշկին

Շատ դեպքերում, մեղվի խայթոցը չի պահանջում բժշկի այցելություն: Ավելի ծանր դեպքերում դուք անհապաղ բուժօգնության կարիք կունենաք:

Զանգեք 1-03 և կանչեք շտապ օգնություն, եթե մեղվի խայթոցի նկատմամբ ունեք ծանր ռեակցիա, որը հուշում է անաֆիլաքսիայի մասին, նույնիսկ եթե դա ընդամենը մեկ կամ երկու գանգատ կամ ախտանիշ է: Եթե ալերգիկ եք և ձեզ նշանակել են շտապ Էպինեֆրինի ինքնաներարկիչ (ԷպիՓեն, Աուվի-Q և այլն), օգտագործեք այն անմիջապես, ինչպես հրահանգել է ձեր բժիշկը:

Անմիջապես դիմեք բուժօգնության, եթե ունեք բազմաթիվ խայթոցներ:

Ձեր բժշկին այցելելու համար պայմանավորվեք, եթե՝

  • մեղվի խայթոցի ախտանիշները չեն անհետանում մի քանի օրվա ընթացքում
  • նախկինում ունեցել եք մեղվի խայթոցի նկատմամբ ալերգիկ ռեակցիայի այլ ախտանիշներ:

Հոդվածը տեղադրվել է՝ 19-05-2023 վերանայվել է՝ 19-05-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով