Ախտանիշներ - Մաստալգիա

Կրծքագեղձի ցավը կարող է լինել ցիկլային կամ ոչ ցիկլային:

Ցիկլային ցավն առաջանում է կանոնավոր, մինչդեռ ոչ ցիկլային ցավը մշտական է կամ դրա առաջացման որևէ օրինաչափություն չկա: Կրծքագեղձի ցավի յուրաքանչյուր տեսակն ունի իր առանձնահատկությունները:

Կրծքագեղձի ցիկլիկ ցավը՝

• հստակ կապված է դաշտանային ցիկլի և հորմոնային մակարդակների փոփոխությունների հետ
• բնութագրվում է որպես բութ և նվացող կամ որպես կրծքագեղձում ծանրության զգացողություն
• հաճախ ուղեկցվում է կրծքագեղձերի այտուցվածության, լցվածության և հանգուցավոր գոյացությունների հետ
• սովորաբար ընդգրկում է երկու կրծքագեղձերը, հատկապես՝ դրանց վերին դրսային շրջանները և կարող է ճառագայթվել դեպի թևատակերը
• ուժեղանում է դաշտանային շրջանի սկզբին նախորդող երկու շաբաթվա ընթացքում, այնուհետև թեթևանում է դաշտանը սկսվելուց հետո
• ավելի հավանական է, որ առաջանա 20-ն անց և 30–ն անց կանանց մոտ, ինչպես նաև 40-ն անց այն կանանց մոտ, ովքեր անցնում են դաշտանադադարի փուլ:

Կրծքագեղձի ոչ ցիկլիկ ցավը՝

• դաշտանային ցիկլի հետ կապ չունի
• բնութագրվում է որպես ճնշման, այրոցի, ծակող կամ նվացող զգացողություններ
• մշտական կամ ընդհատվող է
• սովորաբար ընդգրկում է մեկ կրծքագեղձը՝ որևէ տեղայնացված շրջանում, սակայն կարող է համաչափ տարածվել ամբողջ կրծքագեղձով
• ավելի հավանական է, որ առաջանա հետդաշտանադադարի տարիքի կանանց մոտ:

Արտակրծքային (էքստրամամալ) կրծքագեղձի ցավ

Կրծքագեղձի արտակրծքային ցավը կարծես սկսվում է կրծքագեղձի հյուսվածքից, բայց դրա աղբյուրն իրականում կրծքի տարածքից դուրս է: Կրծքավանդակի մկանը քաշելը, օրինակ, կարող է ցավ առաջացնել կրծքավանդակի պատի կամ կողոսկրի շրջանում, որը տարածվում (ճառագայթվում) է դեպի կրծքագեղձ: Կրծքավանդակի աճառն ընդգրկող հոդաբորբը, որը նաև հայտնի է որպես կոստոխոնդրիտ, նույնպես կարող է ցավ առաջացնել կրծքագեղձում:

Արտակրծքային ցավերը սովորաբար ուժեղանում կամ իրենց բնույթը փոխում են խորը շնչելիս կամ մարմնի դիրքը փոխելիս:

Ե՞րբ այցելել բժշկին

Պայմանավորվեք ձեր բժշկի հետ արտահերթ այցի համար, եթե ձեր կրծքագեղձի ցավը՝

• շարունակվում է ամբողջ օրվա ընթացքում ավելի քան մի քանի շաբաթ
• առաջանում է ձեր կրծքագեղձի կոնկրետ մի շրջանում
• թվում է, թե ժամանակի ընթացքում վատթարանում է
• խոչընդոտում է առօրյա գործերին
• արթնացնում է ձեզ քնից:

Կրծքագեղձի քաղցկեղի ռիսկը շատ ցածր է այն մարդկանց մոտ, որոնց հիմնական ախտանիշը կրծքագեղձի ցավն է, բայց եթե ձեր բժիշկը խորհուրդ է տալիս հետազոտվել, ապա կարևոր է հետևել դրան: