Գրադարան

Ոտքի կոտրվածք. ախտանիշներ

Ոտքի կոտրվածք. ախտանիշներ

Time Read 1 րոպե

Ազդրոսկրը (ֆեմուր) մարմնի ամենախոշոր և ամենաուժեղ խողովակավոր ոսկորն է։ Ազդրոսկրի կոտրվածքը սովորաբար ակնհայտ է, քանի որ դրա համար շատ մեծ ուժ է պահանջվում: Սակայն սրունքի կազմի մեջ մտնող ոլոքի (մեծ ոլոք կամ տիբիա) կամ այն ոսկորի կոտրվածքը, որն անցնում է ոլոքի կողքով (նրբոլոք կամ փոքր ոլոք, ֆիբուլա), կարող է ավելի քիչ ակնհայտ լինել:

Ոտքի կոտրվածքի գանգատներն ու ախտանիշները կարող են ներառել հետևյալը՝

  • ուժեղ ցավ, որը կարող է ավելի սաստկանալ շարժումներ կատարելիս
  • այտուց կամ ուռածություն
  • ցավոտություն
  • արյունազեղում և կապտուկ
  • վնասված ոտքի ակնհայտ ձևախեղում (դեֆորմացիա) կամ կարճացում
  • քայլելու անկարողություն:

Մանկահասակ կամ փոքր երեխաները, ովքեր կոտրում են ոտքը, կարող են սկսել կաղալ կամ պարզապես դադարել քայլել, նույնիսկ եթե չեն կարողանում բացատրել, թե ինչու:

Ե՞րբ դիմել բժշկին

Եթե դուք կամ ձեր երեխան ունեք ոտքի կոտրվածքի մասին վկայող որևէ գանգատ կամ ախտանիշ, անմիջապես դիմեք բուժօգնության: Ախտորոշման և բուժման հետաձգումը կարող է հանգեցնել ավելի ուշ խնդիրների, այդ թվում՝ վատ ապաքինման:

Դիմեք անհետաձգելի բուժօգնության ոտքի ցանկացած կոտրվածքի համար, որն առաջացել է ուժեղ վնասվածքի, օրինակ՝ ավտոմեքենայի կամ մոտոցիկլետի վթարի պատճառով: Ազդրոսկրի կոտրվածքները ծանր, կյանքին հավանական սպառնալիք ներկայացնող վնասվածքներ են, որոնք պահանջում են անհետաձգելի բուժօգնություն՝ տուժած շրջանը հետագա վնասումից պաշտպանելու և մոտակա հիվանդանոց անվտանգ տեղափոխելու համար:

Հոդվածը տեղադրվել է՝ 10-01-2024 վերանայվել է՝ 10-01-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով