Բրոնխիոլիտ

2 րոպե

Բրոնխիոլիտը երեխաների շնչուղիների վիրուսային հիվանդություն է, որն ուղեկցվում է շնչառական անբավարարությամբ։

Շնչառական անբավարարությունն արտահայտվում է երեխայի ազատ շնչելու դժվարությամբ, որի հիմքում ընկած է մանր բրոնխների՝ բրոնխիոլների լուսանցքի բորբոքային ծագման նեղացումը։

Բրոնխիոլիտը սովորաբար հանդիպում է մինչև 12 ամսական երեխաների մոտ։ Վաղաժամ ծնված նորածինների մոտ բրոնխիոլիտը կարող է ստանալ ավելի ծանր ընթացք։

Ի՞նչն է բրոնխիոլիտի պատճառը

Բրոնխիոլիտը զարգանում է թոքերն օդով մատակարարող ամենամանր շնչուղիների՝ բրոնխիոլների բորբոքմամբ։

Բրոնխիոլների բորբոքումը սովորաբար պատճառվում է ռեսպիրատոր սինցիտիալ վիրուսով։ Վիրուսային այս վարակն առաջացնում է բրոնխիոլների պատի բորբոքային այտուց, իսկ շնչուղիների լուսանցքը լցվում և խցանվում է հեղուկով և լորձով։ Արդյունքում, երեխան սկսում է դժվարությամբ շնչել և չի ստանում բավարար թթվածին։

Վիրուսը տարածվում է մանրագույն կաթիլներով, որոնք առաջանում են խոսելիս, հազալիս կամ փռշտալիս (օդակաթիլային), ինչպես նաև վիրուսով վարակված առարկաների և իրերի հետ շփվելիս։

Բրոնխոիլիտի ժամանակ վիրուսի տարածումը կանխարգելող լավագույն ուղիներն են՝

• հիվանդ երեխային մյուս երեխաներից առանձնացնելը
• ձեր ձեռքերը մաքուր պահելը։

Որո՞նք են բրոնխիոլիտի ախտանիշները

Ձեր երեխան կարող է բրոնխիոլիտ ունենալ, եթե նրա մոտ առկա են մրսածության և քթից արտադրության նշաններ, որոնք մեկ-երկու օրվա ընթացքում խորանում են։ Երեխայի շնչառությունը սկսում է հաճախանալ և ուղեկցվել խզզոցներով, ինչը դժվարացնում է սնունդ և հեղուկներ ստանալը։

Հիվանդության նշանները սովորաբար վատթարանում են վարակի երկրորդ կամ երրորդ օրը։ Սուր բրոնխիոլիտը տևում է 7-10 օր, սակայն հազը կարող է շարունակվել ևս մի քանի շաբաթ։

Ինչպե՞ս է բուժվում բրոնխիոլիտը

Երեխայի բուժումն անհրաժեշտ է կազմակերպել նրա բժշկի կամ մանկաբույժի հետ մեկտեղ։ Երեխայի խնամքն այդ օրերին իրականացվում է այնպես, ինչպես այլ վիրուսային վարակների դեպքում՝ հատուկ ուշադրություն դարձնելով շնչառական անբավարարության նշաններին և դրանց հնարավոր վատթարացմանը։

Բուժման օրերին պետք է ապահովել երեխայի հանգիստը։ Հատուկ ուշադրություն է պետք դարձնել փոքր չափաբաժիններով հաճախակի հեղուկներ տալուն, որ կանխարգելվի ջրազրկումը։

Շատ կարևոր է, որ բնակարանում ապահովեք ծխախոտի ծխից ազատ թարմ օդ, քանի որ ծուխը կարող է խորացնել բրոնխիոլիտի գանգատները և ախտանիշները։

Բրոնխիոլիտը սովորաբար պատճառվում է վիրուսով, ուստի հակաբիոտիկները արդյունավետ չեն։

Ե՞րբ դիմել բուժօգնության

Դիմեք երեխայի բժշկին, եթե ձեր երեխայի մոտ նկատում եք հետևյալ ախտանիշները՝

• շնչելիս խզզում է կամ դժվարությամբ է շնչում
• շնչառությունը հաճախացել է (հևոց)
• առնվազն վերջին երկու անգամները ստանում է սովորականից գրեթե երկու անգամ պակաս սնունդ
• վերջին 12 ժամվա ընթացքում տակաշորերը չոր են։

Նաև կապ հաստատեք բժշկի հետ, եթե՝

• ախտանիշներն արագորեն վատթարանում են
• ձեր երեխան 12 շաբաթականից փոքր է
• ձեր երեխան ծնվել է սրտի կամ թոքերի որևէ հիվանդությամբ։

Անհապաղ զանգեք 1-03 և կանչեք շտապ օգնություն, եթե ձեր երեխայի մոտ նկատում եք այս նշաններից մեկնումեկը՝

• խիստ դժվարացած շնչառություն
• գունատված և քրտինքով պատված մաշկ
• շրթունքների շուրջը կամ մատների եղունգների կապտություն
• խիստ հաճախացած շնչառություն
• սնուցման խնդիրներ
• խիստ հոգնածության երևույթներ, երբ երեխան չի կարողանում արթնանալ կամ արթնացնելիս արագ քնում է։