Բրուցելոզ. բարդություններ

Բրուցելոզ. բարդություններ

Բրուցելոզը կարող է ախտահարել գրեթե բոլոր օրգան-համակարգերը, այդ թվում՝ վերարտադրողական համակարգը, լյարդը, սիրտը և կենտրոնական նյարդային համակարգը:

Քրոնիկ բրուցելոզը կարող է նաև ընթանալ բարդություններով, որոնք կարող են սահմանափակվել որևէ մեկ օրգանով կամ ընգրկել բազմաթիվ օրգան-համակարգեր:

Բրուցելոզի հնարավոր բարդություններից են՝

  • Սրտի ներքին թաղանթի բորբոքում (էնդոկարդիտ). սա բրուցելոզի ամենածանր բարդություններից մեկն է: Չբուժված էնդոկարդիտը կարող է ախտահարել կամ վնասել սրտի փականները: Վերջինս բրուցելոզի հետ կապված մահացության առաջատար պատճառն է:
  • Հոդաբորբ (արթրիտ). հոդերի վարակային բորբոքումը դրսևորվում է ախտահարված շրջանի ցավով, կարկամվածությամբ և այտուցով: Կարող են ախտահարվել ծնկան, կոնքազդրային, արմնկային, դաստակային և ողնաշարի հոդերը: Սպոնդիլիտը՝ ողնաշարի միջողնային հոդերի բորբոքումը կարող է առկա գանգատներին ավելացնել մեջքի ցավերը: Սա երկարատև բուժում պահանջող վիճակ է, որը նաև կարող է բերել շարժումների լուրջ սահմանափակումների և հաշմանդամության:
  • Տղամարդկանց մոտ՝ ամորձիների վարակային բորբոքում (էպիդիդիմոօրխիտ). բրուցելոզի հարուցիչը կարող է վարակել տղամարդկանց մակամորձիները (խողովակաձև գոյացություն, որը սերմնածորանը միացնում է ամորձուն)՝ առաջացնելով էպիդիդիմիտ: Այստեղից վարակը կարող է տարածվել բուն ամորձիների վրա՝ առաջացնելով ցավոտությամբ և այտուցվածությամբ ուղեկցվող ամորձու բորբոքում (օրխիտ):
  • Փայծաղի և լյարդի վարակային բորբոքում. բրուցելոզը կարող է նաև ախտահարել փայծաղը և լյարդը՝ առաջացնելով այս օրգանների մեծացում (հեպատոսպլենոմեգալիա), ինչպես նաև գործունեության խանգարում:
  • Կենտրոնական նյարդային համակարգի վարակներ. բրուցելոզի այս բարդությունները ներառում են կյանքին սպառնացող այնպիսի հիվանդություններ, ինչպիսիք են մենինգիտը (գլխուղեղը և ողնուղեղը շրջապատող թաղանթների բորբոքում) և էնցեֆալիտը (բուն գլխուղեղի բորբոքում):

Այս բարդություններից զերծ մնալու լավագույն ուղին հիվանդության վաղ ախտորոշումն է և պատշաճ բուժումը, քանի դեռ հիվանդությունը չի քրոնիկացել: Ուստի, եթե առկա է մարմնի ջերմաստիճանի անբացատրելի կտրուկ բարձրացում, մկանացավեր, անսովոր թուլություն կամ բրուցելոզին բնորոշ այլ գանգատներ, առանց հետաձգելու դիմեք բժշկին:

Հոդվածը վերանայվել է՝ 19-05-2021